Aġġornat mill-Qorti.....
Aktar kmieni llum Eshiemokhai Yakubu Okhiulu, ta’ 30 sena, Niġerjan li joqgħod f’Agrigento fi Sqallija, tressaq il-Qorti mill-Ispettur Nikolai Sant mill-Iskwadra ta’ Kontra d-Droga fejn ġie mixli b’importazzjoni ta’ 640 gramma ta’ droga kannabis.
Okhiulu jinsab mixli wkoll li li assoċja ruħu biex idaħħal id-droga f’Malta u li mporta l-imsemmija droga li nstabet f’ċirkostanzi li juru li ma kintix għall-użu esklussiv tiegħu.
Quddiem il-Maġistrat Dr Anthony Vella, in-Niġerjan wieġeb li mhux ħati, iżda f’dan l-istadju m’għamilx talba għall-ħelsien mill-arrest u għaldaqstant baqa’ jinżamm taħt arrest preventiv. l-Avukat Patrick assista l-akkużat.
Iktar qabel....
Il-Pulizija mill-Iskwadra ta’ Kontra d-Droga kompliet bis-suċċessi tagħha b’konnessjoni mat-traffikar ta’ droga f’pajjiżna li qed tidħol bil-baħar minn Sqallija. Ilbieraħ filgħaxija l-Pulizija żammew Niġerjan li kien qed iġorr madwar kilo ħaxixa tal-kannabis moħbija qalb ikel f’bagalja .
Hekk kif il-Catamaran wasal Malta minn Pozzallo fi Sqallija ftit qabel l-10.00 p.m., il-Pulizija minn din l-iskwadra mmexxijin mill-Ispettur Nikolai Sant, żammew lin-Niġerjan ta’ 28 sena li joqgħod f’Agrigento, Sqallija. Minn tfittixja li għamlu f’bagalja li kien qed iġorr, il-Pulizija sabu d-droga moħbija qalb xi ikel. Din kienet moħbija bejn l-ikel b’tentattiv li jfixkel lill-klieb tal-Pulizija, iżda dan it-tentattiv falla.
B’din is-sejba ta’ madwar kilo droga kannabis ġie informat il-Maġistrat Dr Aaron Bugeja li ordna inkjesta u ħatar diversi esperti tal-Qorti biex iħejju r-rapporti tagħhom u biex tkun analizzata d-droga.
