Krejn jolqot l-apramorta ta’ binja fin-Nadur, Għawdex

Ħaddiema li kienu qed jagħmlu xi xogħol fuq binja li tinsab fi stadju ta’ rikostruzzjoni fin-Nadur, Għawdex, ħelsuha mingħajr ebda ġrieħi meta dalgħodu ftit qabel l-10.00 a.m. krejn li x’aktarx kien qed itella’ xi ġebel jew materjal ieħor, laqat parti minn apramorta ta’ bejt b’konsegwenza li xi ġebel ċedew u waqgħu fuq trakk u laqtu wkoll xi karozzi oħrajn. Ġebel ieħor spiċċa mifrux mat-triq. Li kieku dan l-inċident seħħ 24 siegħa qabel, kieku l-konsegwenzi kienu jkunu aktar gravi.

L-inċident seħħ fi Triq Diċembru 13, li tinsab qrib il-Knisja u fejn nhar ta’ Erbgħa jarma l-Monti. Huwa għalhekk li kieku dan seħħ ilbieraħ seta’ weġġa’ xi ħadd peress li dak il-ħin minn din it-triq jgħaddu ħafna nies fosthom ommijiet bit-trabi u tfal żgħar.

Sorsi minn Għawdex qalu lil illum.com.mt li l-binja qiegħda tiġi konvertita f’Boutique Hotel. Minħabba li dan huwa bini antic, is-sid kellu jħalli l-istess faċċata u l-kumplament se jkun kollu ġdid.

Il-ħoss kbir li għamel il-ġebel li ċeda ħasad lil diversi persuni li kienu fi djarhom kif ukoll oħrajn li kienu fi ħwienet li hemm fil-qrib.

Peress li l-ġebel li ċeda laqat wajers tal-elettriku, issejħu l-ħaddiema mill-Korporazzjoni Enemalta li skonnettjaw il-kurrent biex ikun evitat kull periklu. 

B’dan il-każ ġew informati l-uffiċjali tal-Awtoritá tas-Saħħa fuq il-Post tax-Xogħol filwaqt li l-Pulizija tad-Distrett ħejjew ir-rapport dwar dan l-inċident.