(Aġġornament 1) Inċident tat-traffiku fir-Rabat bejn karozza tal-linja u vann

Inċident bejn karozza tal-linja u vann. Video John Pisani

AĠĠRORNAMENT

Kelliema għall-Pulizija qalulna li x-xufier tal-karozza tal-linja mhux fil-periklu tal-mewt, iżda t-tobba għadhom qegħdin jeżaminawh u qegħdin ukoll jistennew xi riżultati mediċi biex ikun ikkonfermat xi ġrieħi sofra.

Ftit tal-ħin ilu ġejna nformati li r-aġel qiegħed isofri minn ġrieħi gravi.

Nifhmu li dak il-ħin tal-inċident kien hemm żewġ nisa passiġġieri li filwaqt li waħda ma ġralha xejn, l-oħra kienet eżaminata mit-tim mediku fuq il-post imma ma sofrietx ġrieħi gravi.  

iktar kmieni...

Xufier tal-karozzi tal-linja, raġel ta’ 33 sena minn Ħaż-Żabbar, aktar kmieni dalgħodu ddaħħal l-Isptar Mater Dei wara inċident  bejn il-karozza tal-linja li kien qed isuq u vann misjuq minn żagħzugħ ta’ 25 sena minn Birkirkara.

L-inċident seħħ għall-ħabta tas-7.35 a.m. qrib ir-roundabout tan-Nigret. Kollox jindika li l-karozza tal-linja kienet ġejja mid-direzzjoni tar-Rabat filwaqt li l-vann ħareġ mill-Bypass tal-Imtarfa. Mhux qed ikun eskluż li ż-żagħżugħ tal-vann baqa’ ħiereġ għat-triq prinċipali u li kien tard wisq meta ra l-karozza tal-linja.

Jidher li x-xufier tal-linja pprova jevita l-ħabta iżda sab il-vann eżatt quddiemu. Mad-daqqa l-vann safa imbuttat għal fuq centre island. L-impatt kien qawwi ħafna tant li x-xufier tal-linja nqabad qalb it-tifrik u kellhom jissejħu l-memebri tal-Protezzjoni Ċivili biex assistewh biex jinħareġ. Fuq il-post marret ambulanza bl-infermieri li taw l-ewwel għajnuna medika fuq il-post. Wara l-nħareġ minn qalb it-tifrik, ir-raġel ittieħed l-Isptar Mater Dei fejn għadu qed jingħata l-kura meħtieġa. S’issa mhux magħruf il-ġrieħi li sofra.

Min-naħa l-oħra x-xufier tal-vann ma sofra ebda ġrieħi u lanqas il-passiġġier li kien hemm miegħu għalkemm dehru li kellhom xokk fuqhom. Ħadd mill-passiġġieri li kien hemm fuq tal-linja ma sofra ebda ġrieħi.

Fuq il-post tal-inċident marru l-Pulizija tat-Traffiku u dawk tal-RIU. Il-Pulizija tad-Distrett immexxijin mill-Ispettur Sarah Magri flimkien mas-Surġent Graziella Camilleri qegħdin jistħarġu dan l-inċident.

Aktar dettalji hekk kif jaslulna.