Tifel ta’ tmien snin ittieħed l-isptar wara li waqa’ minn tieqa fit-tielet sular ta’ blokka ta’ appartamenti għall-ħabta tat-tmienja u kwart ta' filgħodu fi Triq il-Kulleġġ, il-Mosta.
Minn stħarriġ preliminari jirriżulta li t-tifel fortunatament waqa’ fuq tinda li tinsab fl-ewwel sular, qabel waqa’ fuq il-bankina taħtha.
It-tifel ittieħed b’ambulanza l-Isptar Mater Dei sabiex jingħata kura għal xi ġrieħi li seta’ sofra mad-daqqa.
L-investigazzjonijiet għadhom għaddejjin mill-Pulizija tad-Distrett tal-Mosta.
It-tifel, li ttieħed l-isptar ġie ċċertifikat li qed isofri minn ġrieħi ħfief.
