Ilbierah filgħaxija għall-ħabta tas-00:45, il-Pulizija ta’ Paceville ġiet infurmata li kien hemm argument fi Triq San Ġorġ, San Ġiljan (Paceville).
Il-Pulizija marret minnufih fuq il-post fejn sabet li kien qam argument bejn xi rġiel. Sakemm il-Pulizija kienet qiegħda tipprova tikkalma s-sitwazzjoni, wieħed mill-irġiel ħarab minn fuq il-post.
Minn investigazzjonijiet preliminari li saru rriżulta li kien qam argument bejn żewġt irġiel Libjani li għandhom 33 sena u 35 sena u ieħor Amerikan ta’ 35 sena. Sadanittant, il-Pulizija giet infurmata li ftit ‘il bogħod kien hemm persuna feruta u li din kienet ittieħdet l-isptar għall-kura. Wara iktar stħarriġ ġie stabbilit li din kienet l-istess persuna li ħarbet minn fuq il-post wara l-argument.
Investigazzjonijiet ulterjuri wrew li waqt l-argument, il-Libjan ta’ 35 sena għal xi raguni nbotta lill-Amerikan bil-konsegwenza li dan waqa’ u ħabat rasu ma’ skip tal-ħadid u kif ukoll qala’ diversi daqqiet. L-Amerikan ġie ċċertifikat li qiegħed isofri minn ġrieħi gravi.
Ir-raġel Libjan ta’ 35 sena wkoll ittieħed l-Isptar Mater Dei għall-kura fejn ġie ċċertifikat li qiegħed isofri minn ġrieħi ħfief. Filwaqt li r-raġel ta’ 33 sena rrifjuta l-assistenza medika.
Iż-żewġt irġiel Libjani għadhom qed jinżammu mill-Pulizija sabiex jgħinuha fl-istħarriġ li għadu għaddej.
