filmat | Il-baħar f'San Ġiljan jitla' fit-triq u jkisser bus stop

L-ewwel maltempata propja tal-ħarifa waslet ilbieraħ, u llum it-temperaturi ħadu daqqa 'l isfel partikolarment bir-riħ kiesaħ li kien hawn. Ir-riħ ma qatax u kien tant qawwi li għamel ħsarat f'diversi postijiet, partikolarment f'karozzi fit-toroq, fejn anke waqgħu xi siġar.

Ir-riħ dalgħodu kien tant qawwi li f'San Ġiljan, beda tiela għal fuq it-triq bil-konsegwenza li kisser bus stop, qala' diversi akrtelluni li kienu mwaħħla u kien ta' detriment għas-sewwieqa li bil-kemm setgħu jgħaddu fit-triq minħabba li kienet mimlija ilma. Dan minbarra l-ammont ta' ilma li kkawża ħsarat fil-karozzi li kienu pparkjati fuq in-naħa l-oħra tat-triq.

Il-maltemp u r-riħ wassal ukoll għal xi siġar biex jinqalgħu minn posthom f'xi lokalitajiet u anke waqqa' gradi li kienu madwar postijiet ta' kostruzzjoni u żoni fejn kienu qed isiru x-xogħlijiet fuq it-toroq.

It-twissija ta' riħ qawwi mistennija tibqa' sa iktar tard illum.

Intant, il-Pulizija ħarġet twissija sabiex jiġu evitati ż-żoni ta' madwar il-baħar bħal Triq Borg Olivier qrib il-bajja ta' Spinola minħabba l-mewġ għoli jaħbtu fuq l-art.

Filmat: Clive Azzopardi

Filmat: Oliver Saliba