Wara ħidma li saret fi tmiem il-ġimgħa mill-Iskwadra ta’ Kontra d-Droga, ġew arrestati tmien persuni.
Erbgħa minnhom, li huma kollha rġiel u li l-eta` tagħhom tvajra bejn il-15 u l-21 sena, ġew arrestati f’Marsaskala wara li nstabu fil-pussess ta’ sustanzi suspettati ħaxixa u raża tal-kannabis.
F’każ separat, il-Pulizija arrestat raġel ieħor ta’ 26 sena ġewwa bar fiż-Żejtun wara li nstab fil-pussess ta’ sustanza suspettata kokaina.
F’każ ieħor din id-darba f’Paceville, ġew arrestati żewġt irġiel oħra li għandhom 20 u 35 sena. Ir-raġel ta’ 20 sena nstab fil-pussess ta’ madwar 100 pillola suspettata ecstacy u numru ta’ qratas b’sustanza bajda suspettata kokaina li kienu lesti sabiex jiġu ttraffikati. Minn iktar investigazzjonijiet u tfittxijiet li saru f’garaxx f’Ħ’Attard nstab ukoll ammont sostanzjali ta’ sustanza suspettata ħaxixa tal-kannabis.
Iż-żagħżugħ tressaq il-Qorti llum, b’akkużi relatati ma’ traffikar u pussess ta’ droga fost oħrajn. Huwa wieġeb mhux ħati għall-akkużi miġjuba kontrih u ma ngħatax il-ħelsien mill-arrest. Ir-raġel ta’ 35 sena nstab fil-pussess ta’ sustanza suspettata kokaina.
F’ħidma konġunta mal-uffiċjali tad-dwana, il-Pulizija arrestat raġel ta’ 22 sena, mal-wasla tiegħu fl-Ajruport Internazzjonali ta’ Malta wara li nstab fil-pussess ta’ madwar 3.4 kilogrammi ta’ sustanza suspettata khat. Huwa wkoll tressaq il-Qorti llum fejn ġie akkużat b’importazzjoni u pussess ta’ droga fost oħrajn. Ir-raġel wieġeb mhux ħati għall-akkużi kontrih u ma ngħatax il-ħelsien mill-arrest.
L-investigazzjonijiet tal-Pulizija għadhom għaddejjin.
