Tifel ta’ ħames snin milqut minn vettura
Tifel ta' ħames snin minn Ħal Qormi, iktar kmieni dalgħodu spiċċa vittma ta' inċident fejn intlaqat minn karozza, u konsegwenza ta' dan sofra ġrieħi ta' natura gravi.
Il-każ seħħ dalgħodu ftit qabel it-8:25, meta l-Pulizija ġiet infurmata li kien għadu kemm seħħ inċident stradali fi Triq Correa, Ħal Qormi.
Il-Pulizija tad-Distrett marret minnufih fuq il-post u mill-ewwel stħarriġ irriżulta li tifel ta’ 5 snin residenti Ħal Qormi stess, għal xi raġuni safa’ milqut minn vettura tat-tip Daihatsu Sirion.
Il-vettura kienet qiegħda tinstaq minn mara ta’ 32 sena residenti Ħaż-Żebbuġ.
Fuq il-post issejħet ambulanza li ħadet lit-tifel l-Isptar Mater Dei għall-kura meħtieġa.
Iktar tard, il-Pulizija ġiet infurmata li t-tifel qiegħed isofri minn ġrieħi gravi.
L-investigazzjonijiet tal-Pulizija għadhom għaddejjin.
