Tifel Taljan ta' ħames snin intlaqat minn karozza fin-Naxxar, u spiċċa l-isptar isofri minn ġrieħi gravi.
Il-każ seħħ iktar kmieni llum waranofsinhar, għall-ħabta tas-2:00. Dak il-ħin, il-Pulizija ġew infurmati li kien għadu kemm seħħ inċident stradali fi Triq l-Iskola, in-Naxxar.
Il-Pulizija mill-Għassa tan-Naxxar marru minnufih fuq il-post, fejn minn stħarriġ preliminari illi sar, irriżulta li tifel Taljan li għandu 5 snin kien intlaqat minn vettura tat-tip Mercedes.
Il-vettura kienet qiegħda tinstaq minn raġel ta’ 39 sena, residenti l-Mosta.
Fuq il-post issejħet ambulanza li ħadet lit-tifel l-Isptar Mater Dei għall-kura meħtieġa, fejn ġie ċċertifikat li qiegħed isofri minn grieħi ta’ natura gravi.
L-investigazzjonijiet tal-Pulizija għadhom għaddejjin.
