Spiss nisimgħu b’kampanji u programmi li jinsistu li hawn wisq karozzi fit-toroq u konsegwentement tniġġiż, u għalhekk, jeħtieġ li nsibu mezzi alternattivi ta’ vjaġġar sabiex tittaffa din il-problema. Minkejja li għadu meqjus bħala perikoluż jekk mhux saħansitra ġennata li ssuq rota fit-toroq Maltin, in-numru tal-inċidenti mill-2015 għall-2016 u li kienu jinvolvu ċiklisti naqas b’6.3%.
Dawn iċ-ċifri kienu żvelati f’rapport dwar is-sigurtà nazzjonali tar-roti miġbur mill-Bicycling Advocacy Group (BAG) li janalizza erba’ snin ta’ statistaika ta’ inċidenti relatati maċ-ċikliżmu.
Fil-fatt, ir-rapport tefa’ dawl fuq is-sitwazzjoni taċ-ċikliżmu f’pajjiżna u jsemmi kif mill-2014, in-numru ta’ inċidenti kompla nieżel u qabad din ix-xejra biex minn ftit iktar minn 60 inċident irrappurtat fl-2014, matul l-2016 kien hemm biss ftit iktar minn 40 inċident.
Iktar ċiklisti jfisser iktar sigurtà
Il-Bicycling Advocacy Group qal li ġaladarba ma kien hemm l-ebda bidla jew titjib fl-infrastruttura tat-toroq jew introduzzjoni ta’ xi liġi li tissalvagwardja s-sigurtà taċ-ċiklisti, din ix-xejra ’l isfel fin-numru ta’ inċidenti, waslet minħabba fatturi oħra. Fil-fatt, jattribwixxu dan it-tnaqqis għal żewġ fatturi primarji, essenzjalment, li kien hemm żieda fil-kuxjenza dwar il-perikli tas-sewqan bir-rota minn gruppi lokali bħall-Bicycling Advocacy Group, kif ukoll l-effett magħruf bħala ‘Safety in Numbers’ b’numru dejjem jikber ta’ ċiklisti.
Dan l-effett jitkellem dwar il-fatt li hemm inqas ċans li sewwieq jaħbat ma’ persuna li tkun miexja jew issuq ir-rota, jekk fil-fatt in-numru ta’ dawn ikun qed jiżdied.
Għaldaqstant, huwa wkoll interessanti kif jiġi nnutat li kien hemm tnaqqis fin-numru ta’ inċidenti li jinvolvu karozzi tal-linja, dan anke jidher mill-esperjenzi diretti tal-istess ċiklisti li tkellmu fir-rapport. BAG, fir-rapport tattribwixxi dan it-titjib għal bidliet fit-taħriġ li x-xufiera tal-linja qed jingħataw, hekk kif dawn, saħansitra ngħataw pariri mingħand BAG stess.
Minbarra l-istatistika uffiċjali tal-inċidenti li jinvolvu roti li tinħareġ mingħand il-Pulizija, il-BAG tiġbor informazzjoni mit-triq minn fost iċ-ċiklisti stess ta’ x’inhuma l-ikbar problemi jew sitwazzjonijiet li jafu jipperikolawlhom ħajjithom.
Fil-fatt, mill-informazzjoni f’dan l-istess rapport, jidher li l-ikbar problema li rrappurtaw iċ-ċiklisti hi fil-fatt li s-sewwieqa fit-triq ikunu distratti jew ikunu qed jużaw il-mobile, b’każ irrappurtat għal kull 18.6km. Dan xorta huwa tnaqqis anke mis-sena ta’ qabel, meta kien jiġi rrappurtat każ kull 15.1km.
Minkejja dan, innutaw kif in-numru ta’ inċidenti fejn ċiklisti jintlaqtu b’xi bieba tal-karozza żdiedu wkoll. Iżda dan mhux numru kbir daqskemm żdiedu l-inċidenti fejn sewwieqa jaqtgħu t-triq liċ-ċiklisti u jippruvaw joħorġu jew iduru fit-triq quddiem sewwieq ta’ rota li jkun għaddej.
Dwar il-postijiet fejn l-aktar li jsiru dawn l-inċidenti, ir-rapport jindika li kien hemm żieda qawwija ta’ madwar 57% ta’ inċidenti f’toroq prinċipali, waqt li naqsu dawk f’toroq arterjali. Fl-istess waqt, baqa’ stabbli n-numru ta’ inċidenti f’toroq residenzjali b’20% matul l-2016.
