Raġel ta' 61 sena sofra ġrieħi gravi wara li safa’ milqut minn trakk li jiġbor iż-żibel f'Putirjal waqt li dan kien qiegħed jirriversja.
Il-każ seħħ iktar kmieni dalgħodu għall-ħabta tas-6:05 meta l-Pulizija ġew infurmati li kien għadu kemm seħħ inċident stradali fi Vjal Nelson, il-Belt Valletta (Putirjal).
Minn investigazzjoni preliminari illi saret irriżulta li raġel ta’ 61 sena residenti l-Ħamrun safa’ milqut minn vettura tat-tip Dennis Eagle (scammell) misjuqa minn raġel ta’ 59 sena residenti l-Imtarfa, li dak il-ħin kien qiegħed jirriversja.
Fuq il-post issejħet ambulanza li ħadet lir-raġel ta’ 61 sena l-Isptar Mater Dei sabiex jingħata l-kura meħtieġa.
Aktar tard huwa ġie ċċertifikat li qiegħed isofri minn ġrieħi ta’ natura gravi.
L-investigazzjonijiet tal-Pulizija għadhom għaddejjin.
