Anzjan ta' 71 sena tilef ħajtu dalgħodu wara li kien involut f'inċident tat-traffiku f'Ħal Luqa.
Il-każ seħħ iktar kmieni dalgħodu għall-ħabta tas-6:15 ta' filgħodu meta karozza laqtet lill-anzjan u miet fuq il-post.
Il-Pulizija ġiet infurmata li kien seħħ inċident stradali fi Triq l-Ingiered, Ħal Luqa u meta marru fuq il-post sabu anzjan ta’ 71 sena, residenti Ħal Luqa, mal-art. L-anzjan intlaqat minn vettura Toyota Hilux li kienet misjuqa minn raġel ta’ 58 sena residenti l-Imqabba.
Fuq il-post issejħet ambulanza li ċċertifikat lill-anzjan mejjet fuq il-post.
Bil-każ ġiet infurmata l-Maġistrat tal-Għassa Dr J Demicoli LL.D li ordnat li ssir Inkjesta u ħatret diversi esperti sabiex jassistuha filwaqt li l-investigazzjonijiet tal-Pulizija dwar dan il-każ għadhom għaddejjin.
