Raġel ta’ 57 sena mix-Xewkija sofra ġrieħi gravi wara inċident li seħħ fi Triq Sir Temi Zammit fl-Imġarr f’Malta.
L-inċident seħħ dalgħodu għall-ħabta tas-7.10am, meta kien hemm impatt bejn karozza misjuqa minn raġel ta’ 30 sena mill-Għarb u ‘pickup’ misjuq mir-raġel mix-Xewkija.
Ġuvni ta’ 25 sena li kien passiġġier fil-‘pickup’ ma sofra l-ebda ġrieħi filwaqt li r-raġel ta’ 30 sena sofra ġrieħi ħfief.
Fuq il-post issejħet l-assistenza tal-Pulizija u tim mediku minn Mater Dei b’ambulanza li ħadu l-irġiel l-isptar għall-kura.
Issejħet ukoll ambulanza tal-annimali hekk kif intlaqat kelb li kien qed jaqsam, li iżda sfortunatament miet fuq il-post.
L-investigazzjonijiet tal-Pulizija għadhom għaddejjin.
