Taljan jittajjar f'Wied il-Għajn...isofri ġrieħi gravi

Ilbieraħ filgħaxija, għall-ħabta tas-6:45 pm il-Pulizija ġiet infurmata li kien għadu kemm seħħ inċident tat-traffiku fi Triq il-Qaliet, Wied il-Għajn. Il-Pulizija tad-Distrett marret minnufih fuq il-post u minn stħarriġ preliminari li sar, irriżulta li raġel Taljan li għandu 45 sena, għal xi raġuni safa milqut minn vettura tat-tip Toyota Fun Cargo li kienet qed tinstaq minn raġel ta’ 32 sena li joqgħod Wied il-Għajn.

Fuq il-post issejħet ambulanza li ħadet lill-vittma l-Isptar Mater Dei għall-kura.  Iktar tard, huwa ġie ċċertifikat li qiegħed isofri minn ġrieħi serji. 

Bil-każ ġie infurmat il-Maġistrat tal-Għassa Dr G Mercieca LL.D, li ordna li ssir inkjesta u ħatar diversi esperti sabiex jassistuh.

L-investigazzjoni tal-Pulizija għadha għaddejja.