Qorti | Jinżamm arrestat wara li hedded u offenda Spettur tal-Pulizija

Raġel minn Ħal Qormi inżamm arrestat wara illi hedded lil Spettur tal-Pulizija u offendieh f'diversi telefonati li għamillu. Dan it-theddid sar hekk kif l-Ispettur kien qed jinvestiga lir-raġel minħabba li dan kien akkużat li hedded eks sieħba tiegħu.

L-akkużat illum deher quddiem il-Maġistrat Josette Demicoli. B'kollox l-Ispettur irċieva xejn inqas minn tliet siegħat u nofs ta' telefonati mingħand dan ir-raġel. 

Meta kien qed ikun interrogat mill-Pulizija r-raġel biddel id-diskors u sostna li ma riedx jhedded lill-Pulizija, filwaqt li quddiem il-Qorti illum ma wieġeb għall-ebda mistoqsija li saritlu. 

Wara li semgħet lill-Prosekuzzjoni li spjegat kif l-akkużat kien saħansitra qed jagħmel riċerka fuq l-Ispettur u kien qed ikellem lin-nies dwaru, il-Qorti ddeċidiet li l-akkużat għandu jibqa' taħt arrest.