Ritratti | Tal-Karnival, tal-festa u tal-Ġimgħa l-Kbira maħsuda bil-mewt taċ-Chippy
Sa ġimgħa u nofs ilu, iċ-Chippy kien wieħed mir-reffiegħa ta' San Gejtanu
minn Yendrick Cioffi
Malli nxterdet l-aħbar li kien tilef ħajtu traġikament Jean Paul Bonett, magħruf bħala ċ-Chippy, il-midja soċjali mtliet b'messaġġi ta' għaqdiet u persuni li ħadmu viċin tiegħu.
Ix-xokk kien evidenti fuq diversi persuni li kienu jafu liċ-Chippy u dawn ma kinux ftit, għax apparti li kien dilettant kbir tal-Karnival, iċ-Chippy kien ukoll iħobb ħafna l-festa ta' San Gejtanu u anke kien jerfa' fil-purċissjoni tal-Ġimgħa l-Kbira tal-Belt Valletta.
Diversi għaqdiet tal-festa Ħamruniżi mlew Facebook b'messaġġi ta' tifħir biex isellmu lil Bonett, li sa ġimgħa u nofs ilu kien wieħed mir-reffiegħa tal-vara ta' San Gejtanu.
Sellmulu wkoll diversi fratelli tal-Arċikonfraternità tal-Kurċifiss tal-Belt Valletta, liema fratellanza tieħu ħsieb torganizza l-purċissjoni tal-Ġimgħa l-Kbira, li għal xi żmien, iċ-Chippy kien involut fiha wkoll.
Bonett tilef ħajtu traġikament wara li ħa xokk huwa u jagħmel dak li dejjem ħabb, jiġifieri jaħdem għall-Karnival.
Max-xokk, Bonett waqa' minn fuq il-karru li kien qed jaħdem fuqu u minkejja diversi tentattivi, huwa kien iċċertifikat mejjet fuq il-post.
Intant, iċ-ċelebrazzjonijiet tal-Karnival tas-Sajf li kellhom jibdew mil-lejla tħasru u ġew posposti għal data oħra li għadha trid titħabbar.
