Miriam Pace titneħħa minn taħt it-terrapien ta' darha ... bla ħajja

Miriam Pace, ta' 54 sena imma li kienet se tagħlaq 55 nhar il-ħadd li ġej,  instabet bla ħajja taħt it-tifrik ta' darha stess, wara sigħat ta' tfittxijiet. F'kummenti lill-ġurnalisti preżenti kelliem għall-pulizija qal illi Pace instabet midfuna ferm 'l isfel taħt il-ġebel. 

Aktar kmieni:Il-binja ġġarfet ftit qabel it-3pm u tinsab biswit sit ta' kostruzzjoni
  
Kelliem għall-Pulizija spjega kif il-binja kienet imqassma fuq tliet sulari u għalhekk it-terrapien huwa sostenzjali, bit-tfittxija se tibqa' għaddejja, jekk ikun hemm bżonn, anke bil-lejl.

Il-Pulizija qed tuża klieb u anke drones biex jgħinuha fit-tfittxija.

Intant il-Prim Ministru Robert Abela żar il-post u tkellem mar-raġel ta' Miriam Pace u mar-residenti l-oħra milquta, hekk kif diversi persuni oħra spiċċaw evakwati minn djarhom. 

Prezenti wkoll kien hemm il-Kap tal-Oppożizzjoni Adrian Delia u diversi Ministru, Segretarji Parlamentari u Deputati.

Deher fuq il-post ukoll Sandro Chetcuti, President tal-Assoċjazzjoni Maltija għall-Iżviluppaturi.

F'April tas-sena li għaddiet, ħadd ma weġġa' meta binja ta' tliet sulari waqgħet biswit sit ta' konstruzzjoni fi Gwardamanġia.

Xahrejn wara, f'Ġunju, waqgħet binja fil-Mellieħa. Ħadd ma kien weġġa', anke jekk anzjana kienet inqabdet f'parti mill-binja li żammet fuq sieqha.