Il-Qorti semgħat spettur tal-pulizija jispjega kif raġel akkużat li spara fuq bieb ta’ residenza fiż-Żejtun, kien hedded li joqtol lill-okkupant drabi oħra.
Kmieni dalgħodu kompliet il-kumpilazzjoni tal-provi kontra dan ir-raġel fejn il-Maġistrat semgħat lill-Ispettur tal-pulizija jixhed kif l-għassa taż-Żejtun kienet bdiet tirċievi r-rapporti mill-vittma mit-18 ta’ Lulju.
Ir-raġel kien irrapporta ħsara kriminali fuq il-karozza tiegħu, qal l-ispettur. Il-pulizija investigaw iżda ma waslux għal ħati f'dak l-istadju.
Fil-21 ta' Lulju, ir-raġel reġa’ mar għand il-pulizija biex jirrapporta li ftit minuti biss qabel, kien involut f’inċident mal-akkużat, u qal li kien hedded li joqtlu. L-akkużat kien ittieħed l-għassa tal-pulizija għall-interrogazzjoni iżda kien qal li kienet "kollha ċajta" u li ma kellu l-ebda problema ma' ħadd.
Fl-24 ta' Lulju l-vittma marret l-għassa tal-pulizija għal darba oħra, din id-darba sostna li sab ħsara fuq il-bieb tal-għalqa tiegħu. Imbagħad, fil-5 ta’ Awwissu, ir-raġel kien irrapporta ħsarat fil-bieb ta’ barra, dawn dehru li ġew ikkawżati minn pistola.
Huwa kien ta filmat tas-CCTV lill-pulizija li juru li fis-2:15.a.m, karozza kienet waqfet barra d-dar tiegħu u xegħlet id-dwal, għammet parzjalment is-sistema tas-CCTV u ġie sparat tir mill-karozza. Minkejja li d-dwal għamel li l-pjanċi tan-numri tal-karozza impossibbli li jinqraw, l-akkużat ġie identifikat minn ħsara partikolari li kienet saret darba oħra fil-passat.
Wara li nstabet il-karozza, sidha ġie arrestat. Il-pulizija li kienet qed tfittex il-karozza sabet skartoċċ aħmar ta’ senter użat min-naħa tal-passiġġier. Wara tfittxija fid-dar tiegħu, il-pulizija rkuprat pistola u skrataċ ħomor.
L-akkużat kien irrifjuta li jwieġeb mistoqsijiet tal-pulizija jew jiffirma d-dikjarazzjoni tiegħu, qal l-ispettur, u żied li l-akkużat kien diġà fuq pleġġ u kien barra bi ksur tal-kundizzjonijiet tal-pleġġ tiegħu.
Qabel l-inċident, membri tal-familja tal-akkużat kienu rieduh jara tabib minħabba li ma kienx qed jaġixxi b'mod normali, qalet il-Qorti.
Il-każ ikompli f’Settembru. L-akkużat qed jaffaċċja akkużi serji, inkluż pussess illegali ta' arma tan-nar, li ġarrha sa 200 metru minn żona residenzjali, li spara l-arma, li kkawża lill-allegat vittma biża, li ta fastidju, insulta u hedded lill-vittma, u fuq kollox li għamel dan kollu bi ksur tal-kundizzjonijiet tal-pleġġ tiegħu
