Moviment Graffiti qed jitlob azzjoni immedjata mingħand il-Prim Ministru, Ministru tal-Ippjanar u Kap eżekuttiv tal-Awtorità tal-Ippjanar kontra pixxini ‘illegali’ tal-iżviluppatur Josph Portelli fil-Qala.
L-NGO qed titlob ukoll li jsiru l-bidliet neċessarji fil-liġiijiet li ħallew l-istrutturi ‘illegali’ jitlestew qabel inqata’ l-appell, hekk kif saħqu li l-permess għal dawn il-pixxini ġie revokat b’mod definittiv mill-Qorti tal-Appell fit-13 ta’ Marzu 2024 wara appell imressaq mill-Moviment Graffitti u l-Kunsill Lokali tal-Qala.
Il-Moviment Graffitti ikkritika l-attitudni ta’ Joseph Portelli, filwaqt li nnota l-affermazzjoni pubblika tiegħu għax-xogħlijiet ‘illegali’ li saru fil-Qala anke qabel ma tressqet applikazzjoni għall-ippjanar. Barra minn hekk, il-Moviment Graffitti enfasizza revoki simili ta’ permessi fl-istess jum fis-Sannat, u kixef xejra ta’ disrispett tar-regolamenti tal-ippjanar mill-iżviluppatur.
L-organizzazzjoni fakkret ukoll fil-wegħda tal-Prim Ministru Robert Abela fl-1 ta’ Mejju 2023, fejn wiegħed li se jirriforma l-liġijiet biex jissospendi l-eżekuzzjoni tal-permessi sakemm jiġu deċiżi l-appelli. Madankollu, Moviment Graffiti qal li dawn ir-riformi mwiegħda għad iridu jimmaterjalizzaw, b'konsultazzjoni pubblika kontenzjuża biss, li timmira li tillimita d-dritt ta' appell aktar milli tindirizza l-kwistjoni ewlenija.
Fid-dawl ta’ dawn l-iżviluppi, Moviment Graffitti jitlob żewġ azzjonijiet, azzjoni immedjata u riforma leġiżlattiva urġenti għall-ippjanar tal-liġijiet tal-appell biex jissalvagwardjaw id-drittijiet tal-appellanti u jipprevjenu l-iżviluppi milli jipproċedu sal-appelli.
