Matul is-sajf li għadda Floriana bi ftit tibdiliet meħtieġa kienu lesti li jimxu ’il quddiem minn fejn ħallew fil-kampjonat preċedenti. Qabel il-bidu tal-kampjonat ta’ din is-sena, dehru li se jkunu tim b’saħħtu. Bħala pre-season kienu mħejjija tajjeb. F’Awwissu rebħu l-AME Cup li ntlagħbet fil-grawnd tas-Sirens f’San Pawl il-Baħar, bejn Qormi, Naxxar Lions, Vittoriosa Stars, Tarxien Rainbows, Mosta, Rabat Ajax, Balzan u l-istess Floriana.
Għalhekk l-aspettattivi fost il-partitarji Furjaniżi kienu mogħla s-sema!
Però l-ewwel doċċa kiesħa ġiet meta Floriana tnaqqsulhom sitt punti qabel il-bidu tal-kampjonat. Dan poġġa lit-tim ta’ Floriana fit-triq għat-telgħa. Għall-bidu, b’mod speċjali fl-ewwel tliet logħbiet Floriana ma setgħux jinqalgħu minn din is-sitwazzjoni. Iżda, Floriana dan l-aħħar kisbu punti importanti u rebħu diversi logħbiet u temmew is-sena 2013 minn -6 għal 21. Dan mertu tal-plejers li hemm fit-tim ta’ Floriana, li ħafna minnhom huma żgħażagħ mimlija ħeġġa għar-rebħ. M’hemmx dubju li fost il-plejers li l-iktar impressjonaw għalihom sa issa nsibu lil Igor Coronado li meritament rebaħ l-unur prestiġjuż tal-BOV Plejer tax-Xahar għal Ottubru. Kollox jindika li għalkemm bdew b’6 punti neqsin huma jistgħu jagħmluha fiċ-Championship Pool fejn tabilħaqq jistoqqilhom li jkunu meta wieħed jikkunsidra l-istorja glorjuża tagħhom.
