Il-UĦM toħroġ għonqha għal Jason Azzopardi

Il-UĦM ħarġet għonqha għal Jason Azzopardi u qalet li l-każ tiegħu jimplika li membru parlamentari mhux liberu li jikkummenta fuq dak li jkun għaddej.

Fl-editorjal tal-magażin tal-istess union, is-segretarju ġenerali, Josef Vella qal li dan il-każ huwa ta' interess għall-Union, u qal li kien jistenna li "jekk il-Gvern mhux involut fil-każ, jintervjeni biex jiżgura li dan l-inċident, ma jkomplix jintilef il-kontroll tagħha." Vella jkompli jgħid li, "minn dak li ġie rrappurtat fil-media, jidher li l-Labour li qiegħed fil-Gvern, huwa wara dan il-każ. Dan kien evidenti meta grupp ta' żgħażagħ Laburisti inġabru quddiem il-Qorti qabel ma nstema' l-każ."

Vella jkompli jgħid li jekk dan il-każ jeskala, "ikun hemm konsegwenzi għall-politika Maltija, li mhix għaddejja minn perjodu tajjeb bħalissa."

Fl-editorjal tal-magażin tal-Union, Vella sostna li hemm ukoll theddida għad-demokrazija politika, billi "qed jiġi limitat id-dritt li partiti politiċi jtellgħu il-messaġġ tagħhom liberament." Hawnhekk kien qed jirreferi għad-deċiżjoni li billboards politiċi jistgħu jittellgħu biss fi żmien elezzjoni, u mhux qabel. Dan waqt li l-Gvern, ikompli jgħid Vella, "jibqa' juża dawn il-billboards b'għanijiet politiċi, li qed jitħallsu mit-taxxi pubbliċi."