'Il-qtil ta' Cox jista' jbiddel ir-riżultat tar-referendum'

Il-ġimgħa li ġejja, l-elettorat Britanniku se jieħu deċiżjoni ferm importanti li l-eżitu tagħħa jiddetermina l-futur tar-Renju Unit kollhu, u probabbli anke dak politiku u finanzjarju tal-bqija tal-Ewropa.

Dan is-sit tkellem ma l-avukat u opinjonista Joe Ellis u l-Kap tal-Uffiċċju tal-Parlament Ewropew Peter Agius li taw l-opinjoni tagħhom dwar l-influwenzi li qed jeffetwaw l-elettorat, ir-raġunijiet favur u kontra t-tluq mill-UE u l-effetti li jista jħalli tluq fuq ir-Renju Unit, l-UE u l-pajjiżi l-oħra.

Jidher li kien hemm swing favur il-Brexit. Kemm taħseb li dan l-iswing se jkun sostnut u fil-fatt iwassal għall-ħruġ tar-Renju Unit mill-UE?

“Bosta stħarriġ tal-opinjoni qed ipoġġi lil min irid jitlaq fil-vantaġġ bħalissa” isostni  Ellis, li jaħseb li l-kamp ta' min irid jitlaq mill-UE akkwista ħafna momentum f'dawn l-aħħar ġimgħat, speċjalment minn mindu d-dibattitu pubbliku spiċċa jiffoka fuq l-immigrazzjoni. 

Bosta stħarriġ tal-opinjoni qed ipoġġi lil min irid jitlaq fil-vantaġġ bħalissa Joseph Ellis

Peter Agius minn naħa l-oħra jaħseb li l-polls huma volatili ferm, minħabba li l-elettorat Ingliż qed jiġi ppreżentat b’żewg stampi kuntrastanti.

“Wieħed jista’ jinnota li filwaqt li l-maġġoranza tal-media popolari hija favur Brexit, il-mexxejja tal-partiti politiċi kollha ħlief wieħed huma favur li jibqgħu membri ta’ l-UE” tenna Agius, li ħareġ b’punt validu li l-elettur inħolqitlu dilemma jekk jagħtix kas x’tgħid il-media jew jisma’ mill-opinjoni tal-politiċi.

Wieħed jista’ jinnota li filwaqt li l-maġġoranza tal-media popolari hija favur Brexit, il-mexxejja tal-partiti politiċi kollha ħlief wieħed huma favur li jibqgħu membri ta’ l-UE Peter Agius

“Lil min se nemmen? lill-gazzetti jew lill-politiċi?”, temm jgħid Agius.

Punt validu ieħor li jista’ jeffetwa d-deċiżjoni, li nnota  Ellis, huwa l-qtil tad-deputat Laburista Jo Cox, li kienet kontra l-Brexit. "F'moħħ u qalb l-elettorat,  dan  jista' jbiddel l-eżitu inċert tar-referendum".

L-immigrazzjoni jidher li kienet fattur kruċjali ta’ fejn kienet qed tmur l-opinjoni pubblika. Kemm taħseb li hu ġustifikat li d-dwejjaq ta’ ħafna Ingliżi fuq l-immigrazzjoni qed ikun direzzjonat lejn l-UE?

Fuq dan il-punt, naraw li kemm Joe Ellis u Peter Agius jaqblu li huwa assolutament bla ġustifikazzjoni li tiġi akkużata l-UE għall immigrazzjoni.

Peter Agius jirraġuna li r-Renju Unit mhux fiż-żona Schengen u għaldaqstant jibqgħu b’ kontroll sħiħ ta’ min jidħol fit-territorju tagħhom għal finijiet ta’ sigurta u immigrazzjoni. Ellis iżid jgħid li l-immigrazzjoni fir-Renju Unit hija bżonnjuża għall-fatt li hemm impjiegi li m'humiex sodisfatti bil-manodopera disponibbli.

“Dan qed jiġri fir-Renju Unit u anke f'pajjiżna” sostna Ellis. "Setturi kbar tal-ekonomija tar-Renju Unit fosthom l-Iskema Nazzjonali tas-Saħħa jiddependu fuq ħaddiema barranin."

Agius iżid jgħid li r-Renju Unit huwa pajjiż li għandu madwar żewġ miljun ċittadin tiegħu jgħixu fil-pajjiżi Ewropej, fosthom f’Malta u ċioe madwar l-istess figura ta’ persuni Ewropej li jgħixu fir-Renju Unit.

Ellis itemm l-argument billi jispejga li jekk ir-Renju Unit jagħżel li joħroġ mill-UE, u minflok jagħżel il-mudell Norveġiż, kif bosta minn dawk li jridu jitilqu mill-UE qed igħidu, żgur ikollu jaċċetta l-moviment ħieles tal-ħaddiema kif inhu fil-każ tan-Norveġja sabiex ikollu aċċess għas-suq uniku. 

“Fl-aħħar mill-aħħar”, itemm Ellis, “Brexit u mhux Brexit, il-famuż plumber pollakk ser jibqa' jmur jaħdem fir-Renju Unit jekk hemm xogħol għalih.”

Hawn min qed jitkellem dwar ‘kastigi’ fil-każ ta’ Brexit. Kemm taħseb li dan huwa ġust u kif tara li l-UE tista tirritalja biex dak li jkunu għamlu l-Ingliżi ma jagħmlux ħaddieħor?

“Kastig kelma kerha”, jibda l-argument tiegħu Agius, iżda jkompli bill jisħaq li “huwa evidenti li fi- każ ta’ Brexit, ir-reazzjoni tal-UE fil-konfront tar-Renju Unit se tiddetermina l-messaġġ li jintbgħat lill-pajjiżi l-oħra u lill-partiti radikali li qed jinbtu kullimkien madwar l-Unjoni.”

Minn naħa l-oħra Ellis isostni li "il-kastigi fuq  ir-Renju Unit jistgħu jitqiesu bħala att ta' mażokiżmu da parti tar-Renju Unit stess.”

Agius iżid jgħid li “Huwa evidenti li bi ‘kważi sħubija’ bil-benefiċċji, iżda mingħajr l-iżvantaġġi, dan idgħajjef bi kbir l-istess valur tas-sħubija sħiħa.”

Skond statistika kkwotata minn Ellis, il-Fond Monetarju Internazzjonali qed jipprevedi illi fil-każ ta' Brexit, il-Prodott Gross Domestiku tar-Renju Unit jinżel b'5.5% sal-2019; b'1.5% jekk jiġi adottat il-mudell norveġiż. 

“Huwa żgur li l-inċertezza li toħloq Brexit se tħalli effett negattiv fuq l-ekonomija tar-Renju Unit”, jikkonkludi Ellis.

(Aqra aktar dwar ir-referendum fir-Renju Unit f'analiżi u opinjonijiet għada fil-ħarġa tal-gazzetta ILLUM)