'L-ewwel ipprova jirredikola dan il-każ serju, imbagħad spiċċa jiddefendih'

Joseph Muscat kompla jikkonferma kemm hu ħaġa waħda ma’ Keith Schembri, meta quddiem każ ċar ta’ kunflitt ta’ interess miċ-Chief of Staff tiegħu, flok jieħu azzjoni deċiżiva, l-ewwel ipprova jirredikola dan il-każ serju,  imbagħad, wara aktar pressjoni mill-ġurnalisti, spiċċa jiddefendih. Dan hu każ ieħor fejn il-Prim Ministru hu kompliċi ma’ Keith Schembri li ddefendih akkost ta’ kollox wara li nqabad li fetaħ kumpanija sigrieta fil-Panama. 
Dan qalu l-Viċi Kap tal-Partit Nazzjonalista għall-Ħidma fil-Partit Beppe Fenech Adami waqt konferenza tal-aħbarijiet li matulha ta r-reazzjoni tiegħu għall-mod kif qed jaġixxi Muscat fil-kwistjoni tal-kunflitt ta’ interess li għandu ċ-Chief of Staff tiegħu fix-xiri tal-apparat u l-manutenzjoni mill-kumpanija Crane Currency. 
Beppe Fenech Adami qal li mill-bidu nett, id-deċiżjoni li Muscat jaħtar lil Keith Schembri - b’daqshekk interessi kummerċjali fin-negozju - bħala Chief of Staff tiegħu, kienet deċiżjoni ħażina. Dwar il-kwistjoni ta’ Crane Currency, Beppe Fenech Adami qal li Muscat għandu ħafna xi jwieġeb, fost l-oħrajn: • meta bdew it-taħdidiet bejn l-Uffiċċju tal-Prim Ministru u Crane Currency • min kien involut f’dawn it-taħdidiet • xi rwol kellu Keith Schembri f’dawn it-taħdidiet • meta kien involut Keith Schembri f’dawn it-taħdidiet Il-Viċi Kap tal-Partit Nazzjonalista qal li l-poplu Malti u Għawdxi għandu kull raġun li jissuspetta f’kull ħaġa li fiha jkun involut Keith Schembri. Dan peress li ċ-Chief of Staff tal-Prim Ministru, fost l-oħrajn, inqabad li fetaħ kumpanija sigrieta fil-Panama biex fiha - fi kliemu stess - jitfa’ l-miljuni tal-ewro ġejjin mill-commissions. “F’dan il-każ, qed jiġi spjegat u allegat li Keith Schembri - bl-interessi kummerċjali tiegħu bil-kumpanija Kasco Ltd - jista’ jkun li jdaħħal il-flus minn commissions li jkunu ġejjin mix-xiri u manutenzjoni millkumpanija Crane Currency,” qal Beppe Fenech Adami.  
Minn naħa tiegħu, x-Shadow Minister tal-Ġustizzja, d-Demokrazija u dDrittijiet taċ-Ċittadin Jason Azzopardi qal li filwaqt li Muscat m’għandu ebda idea dwar jekk jeżistix kunflitt ta’ interess f’dan id-deal ta’ Keith Schembri, kull min hu serju jaf li jeżisti kunflitt ta’ interess kbir. “Għandna sitwazzjoni fejn persuna - fir-rwol tiegħu ta’ Chief of Staff tal-Prim Ministru - qed jagħmel negozjati ma’ kumpanija privata, liema negozjati se jwasslu biex l-istess persuna - fir-rwol tiegħu ta’ shareholder ta’ kumpanija privata - idaħħal il-commissions,” qal Jason Azzopardi. 
Hu sostna li llum, ħafna nies qed jaslu għall-konklużjoni li kien hemm raġuni għaliex Muscat ħalla lill-kumpanija De La Rue fi problemi li wasslu biex il-kumpanija tnaqqas in-nies. “Prim Ministru serju kien, f’ċirkostanzi fejn waħda mill-akbar kumpaniji f’pajjiżek qed tbati, jieħu d-deċiżjonijiet kollha neċessarji biex isalva kull impjieg. Deċiżjonijiet li anke ttieħdu fi żminijiet ekonomikament diffiċli,” qal Jason Azzopardi. 
Ix-Shadow Minister żied jgħid li hu ovvju li meta Muscat jgħid li m’għandux idea x’qed jagħmel Keith Schembri, l-Prim Ministru qiegħed jigdeb. “Kieku vera m’għandux idea x’qed jagħmel iċ-Chief of Staff tiegħu, kieku Muscat verament tilef il-kontroll tal-pajjiż, u d-deċiżjonijiet kollha qed jeħodhom Keith Schembri,” qal Jason Azzopardi. “Id-deċiżjonijiet ħżiena ta’ Muscat qed jagħmlu ħsara kbira lil pajjiż. F’dan il-każ, storja li kellha tkun waħda pożittiva, spiċċat imtappna u se tibqa’ mtappna b’akkużi serji ta’ kunflitt ta’ interess miċ-Chief of Staff tal-Prim Ministru,” temm jgħid Jason Azzopardi.