Il-Partit ta' Marlene jiddeskrivi d-deportazzjoni ta' immigranti tfal bħala 'inuman'

Il-Partit Demokratiku (PD), fi stqarrija, qed jipproponi li tfal imwielda Malta, ikunu meqjusa ugwali fi ħdan is-socjetà Maltija. Il-PD saħaq li huwa ferm imħasseb meta jara "diversi minn ulied Malta mwielda minn ġenituri ta’ nazzjonalità barranija fil-periklu li jitkeċċew minn l-art li tathom il-ħajja flimkien mal-ġenituri tagħhom."

Filwaqt li l-Gvern ippronunzja ruħu li qed jonora l-obbligi Ewropej; jaċċetta t-tkeċċija ta’ persuni mill-art li suppost tathom isimha u li bosta minnhom ħadu edukazzjoni f’Malta stess; biex jintbagħtu f’art fejn qatt ma għexu. "Dan l-aġir għandu jitqies bħala trattament inuman u degredanti. Dawn it-tfal integraw fis-soċjetà Maltija, anke permezz tal-edukazzjoni li ħadu; għexu fil-kommunitajiet fl-ibliet u rħula Maltin, fejn għamlu ħbieb ma’ bosta ċittadini Maltin oħra," kompliet tgħid l-istqarrija tal-PD.  

Għalhekk dawn it-tfal u żgħażagħ għandhom ikunu meqjusa ta’ Maltin, minkejja li twieldu f’artna minn persuni ta’ nazzjonalità differenti, li kienu residenti Malta, abbażi ta’ protezzjoni umanitarja temporanja, li f’diversi każijiet tawlet bosta snin.