Qtil Daphne | Attivisti jtellgħu tliet billboards biex jitolbu ġustizzja

L-attivisti ta' #OccupyJustice tellgħhu tliet billboards erbgħa xhur wara l-assassinju tal-ġurnalista Daphne Caruana Galizia li jisħqu li mingħajr riżenji mhux se jkun hemm ġustizzja.

Fi stqarrija, il-grupp spjega li kien ispirat mill-film Three Billboards Outside Ebbing, Missouri, li kien ġie nnominat għal diversi premji Oscar, u jirrakkonta l-ġrajja ta' omm imnikkta tfittex ġustizzja għall-assassinju ta’ bintha. 

Wara li jkunu għaddew ix-xhur u jibqgħu ma jinstabux dawk ħatja, l-omm tagħmel xi ħaġa mhux mistennija u poġġiet tliet billboards f'toroq ewlenija, b’messaġġi diretti lejn il-Kummissarju tal-Pulizija li jgawdi mir-rispett tan-nies.

Dawn il-billboards ttellgħhu fi Triq Reġjonali u fi Triq il-Kosta b’messaġġi iebsa u diretti lejn il-Prim Ministru.

It-tliet billboards jgħidu:

• Ġurnalista maqtula. Bla ġustizzja
• Pajjiż misruq. Bla ġustizzja
• L-ebda riżenja. Bla ġustizzja

L-attivisti saħqu li wara erba' xhur għadu mhux magħruf minn ordna l-assassinju ta' Caruana Galizia.

Jistaqsu lill-Prim Ministru x'interess kellu li jżomm lill-Ministru Konrad Mizzi u liċ-Chief of Staff Keith Schembri. “Għaliex għadu ma keċċihomx? X’qed jistenna?”

#OccupyJustice fakkret ukoll fit-talbiet tagħha għar-riżenja tal-Kummissarju tal-Pulizija, Lawrence Cutajar, u tal-Avukat Ġenerali, Peter Grech li, fi kliem l-istqarrija, qed jiżfnu għad-daqqa tal-Gvern. 

"Din hija darna, dan hu pajjiżna, u aħna l-poplu tiegħu.  Nippretendu aħjar, ħaqqna aħjar, neżiġu aħjar," ittemm l-istqarrija

Dalgħodu, biswit ir-ritratt ta' Daphne, fuq il-Monument tal-Assedju dehru wkoll ritratti ta' Mintoff, Karin Grech u Raymond Caruana.