Il-President Marie Louise Coleiro Preca hija mħassba dwar id-dibattiti polarizzati li qed isiru dwar l-emendi għall-liġi dwar il-protezzjoni tal-embrijuni. "Dan it-tip ta’ dibattitu ma jgħinx kostruttivament biex jiġu mifhuma b’mod ħolistiku l-implikazzjonijiet umani, soċjali, etiċi u mediċi," sostniet il-President tar-Repubblika.
"It-trattament tal-IVF huwa suġġett delikat li jinħtieġ li jkun diskuss f’ambjent seren, li jibbilanċja l-qsim il-qalb li jiffaċċjaw koppji bla tfal, ma’ kwistjonijiet etiċi sensittivi li għandhom x’jaqsmu mad-drittijiet tal-embrjuni."
Il-President Coleiro Preca qalet li hija mħassba bl-ostilità li sfortunatament qed toħroġ minn dibattiti pubbliċi.
Intant f'mossa li tista' titqies bla preċedent il-President Coleiro Preca qed tappella għall-kalma u "għall-perjodu itwal ta’ riflessjoni sabiex il-vuċijiet kollha jinstemgħu," Dan ifisser allura l-posponiment temporanju tad-dibattitu li bħalissa jinsab il-Parlament fi stadju tat-Tieni qari bil-Gvern favur l-emendi u l-Oppożizzjoni, kontra.
Coleiro Preca qed toffri li sservi ta' medjatur u qed tistieden il-Parlamentari, is-soċjetà ċivili, u l-istakeholders kollha biex jiġu flimkien madwar il-mejda biex ikollhom dibattitu nfurmat li jgħaqqad flimkien, il-konsiderazzjonijiet etiċi u morali mal-għarfien xjentifiku għal liġi li tkun tirrifletti b’mod sħiħ il-potenzjal mediku u l-implikazzjonijiet pozittivi u negattivi għas-soċjetà.
Intant fi stqarrija l-għaqda Gift of Life esprimew is-sodisfazzjon tagħhom għall-intervent tal-President fir-rigward tal-att dwar l-embrijun u inkoraġġixxew lid-Deputati biex jieħdu l-pariri ta' Coleiro Preca. .
