Anthony J. Abela Medici ġie maħtur bħala l-Kummissarju l-ġdid għall-Għaqdiet Volontarji wara li l-Professur Kenneth Wain kien ilu jservi din il-kariga mill-2007, jiġifieri minn meta twaqqaf il-Kummissarjat.
Qabel din il-ħatra, Abela Medici għamel iktar minn 30 sena fil-Laboratorji Forensiċi tal-Pulizija ta’ Malta.
Fl-2016, ġie elett mill-Kunsill tal-Ministri tal-Kunsill tal-Ewropa biex iservi fuq il-Kumitat ta’ Esperti għall-Prevenzjoni tat-Tortura u Trattament jew Pieni inumani jew Degradanti.
Huwa serva wkoll bħala Chairperson tal-“Guard and Warden Disciplinary Board”, u mexxa numru ta’ Bordijiet ta’ Inkjesta oħra matul dawn l-aħħar 40 sena.
Bħalissa huwa wkoll il-President tal-Kunsill tas-Sigurtà tat-Toroq ta’ Malta, Membru tal-Awtorità tat-Trasport ta’ Malta u jirrappreżenta lil Malta bħala r-rappreżentant lokali tar-Royal Society of Chemistry.
Barra minn hekk, Abela Medici għandu diversi snin ta’ esperjenza fis-settur volontarju, fejn serva bħala President tal-Malta Cactus u Succulent Society, President u Membru fuq Kunsilli tal-Assoċjazzjoni Katenjana f’Malta, Membru u mbagħad Viċi President tas-Sliema Lions Club u s-Segretarju Onorarju tal-Assoċjazzjoni tal-iScouts ta’ Malta, Direttur ta’ Scout Association of Malta Company Limited (TSAM) u tal-Fondazzjoni Leap tal-Assoċjazzjoni ta-iScouts, membru tal-“Byzantine Order of the Holy Sepulchre, of the Order of St Lazarus”, membru tal-“Philatelic Society of Malta”, membru għal-għomru tal-ALPS Association of Lyceum Past Students u assoċjazzjonijiet oħra.
Bħala Kummissarju, huwa għandu jassigura r-rispett tad-dispożizzjonijiet tal-Att dwar l-Organizzazzjonijiet Volontarji, biex jirregola organizzazzjonijiet volontarji biex jikkonformaw mal-liġi biex jiksbu standards għoljin ta’ responsabilità u trasparenza.
