Ftit tal-ħin ilu l-kuntrattur Joseph Portelli, li spiċċa f'nofs kontroversja dwar permess mogħti fil-Qala biex kamra żgħira u abandunata f'ODZ issir villa, irrinunzja l-istess permess u allura abbanduna u mhux se jsegwi l-iżvilupp li qajjem kontroversja u rabja kbira fl-aħħar jiem.
Dan l-iżvilupp ingħata fuq il-premessa ta' policy introdotta mill-Gvern preżenti fl-2014 biex binjiet mitluqin li kienu abitati qabel l-1978 ikunu jistgħu jerġgħu jsiru postijiet ta' abitazzjoni, jekk min qed iressaq l-applikazzjoni jista' jipprova dan. Jidher illi din il-prova ngħatat b'mod sodisfaċenti f'dan il-każ u allura l-permess ħareġ.
Dan qajjem għagħa kbir b'diversi persuni inkluż l-eks Segretarju Ġenerali Laburista Jason Micallef u l-eks Mexxej Laburista Alfred Sant, jikkritikaw il-mod kif kien mogħti dan il-permess lil Portelli, li qed jiżviluppa wkoll Mercury House f'Paceville.
'Qatt ma tlabna pjaċiri mill-awtorità u qatt m'aħna se naċċettaw li nkunu trattati b'mod differenti'
Fi stqarrija mibgħuta mill-istess kuntrattur dan qal illi l-applkiazzjoni għar-restawr u estensjoni ta' din il-proprjetà saret wara riċerka estensiva li kkonfermat illi l-proprjetà kienet tintuża bħala residenza fil-passat. "L-applikazzjoni ġiet sottomessa fuq l-istess parametri ta' applikazzjonijiet oħrajn fuq siti simili."
Il-kuntrattur fakkar illi għexieren jekk mhux mijiet ta' każi kienu approvati mill-istess awtorità. "Uħud minn dawn l-applikazzjonijiet ingħataw permess għal residenzi li bilkemm kellhom il-pedamenti tal-binjiet preċedenti."
"Aħna qbilna wkoll li nemendaw il-pjanijiet u nnaqqsu aktar l-estensjoni li hija limitata għal dak li huwa marbut mal-binja preżenti.
"Għal xi raġuni stramba," ikompli jgħid il-kuntrattur, "din l-applikazzjoni kienet inġustament identifikata mill-PA u l-midja."
"Qatt ma tlabna pjaċiri mill-awtorità u qatt m'aħna se naċċettaw li nkunu trattati b'mod differenti minn oħrajn. L-Awtorità trid tassigura li l-policies huma ċari u applikati mingħajr diskriminazzjoni."
