Il-kandidat għall-Mexxej tal-Partit Laburista u eventwalment Prim Ministru, Robert Abela, nieda l-kampanja tiegħu bit-tema ‘Flimkien ‘il Quddiem.’
F’messaġġ irrekordjat, b’għadd ta’ persuni bilqiegħda warajh, Robert Abela insista li l-Prim Ministru l-ġdid irid ikompli jibni fuq is-suċċess tal-Gvern fl-aħħar seba’ snin.
Fil-fatt, aktar milli proposti għall-Partit Laburista, Robert Abela ressaq għadd ta’ proposti li jimplimenta jekk ikun Prim Ministru.
“L-għaqda tibqa’ l-qofol tas-suċċess tagħna,” saħaq Abela waqt li insista li l-ewwel prijorità tal-Prim Ministru l-ġdid għandha tkun li jara l-pajjiż jirritorna għat-trankwillità u s-serenità.
Fi kliemu, irid li jimplimenta “revoluzzjoni soċjali akbar minn dik li rajna sa issa” biex il-ġid jasal għand kulħadd.
Beda bil-housing u fakkar li din kienet wiegħda ewlenija fil-Manifest Elettorali tal-Partit Laburista.
Saħaq li huwa realtà li f’Malta hawn familji li mhux qed ilaħħqu mal-kera jew qed jgħixu f’akkomodazzjonijiet mhux daqstant addattata.
Fakkar li l-Gvern qed jibni 1,000 unit ġdid.
“Iżda dawn in-nies jeħtieġu ċavetta mill-aktar fis,” saħaq Robert Abela.
Għadda biex jitkellem fuq il-pensjonanti u ppropona li fuq perjodu ta’ ħames snin, il-mediċini kollha li jinxtraw mill-pensjonanti, jibdew jingħataw b’xejn. Saħaq li din hija miżura li se tiswa lill-Gvern €40miljun.
Tkellem dwar il-ħaddiema barranin u saħaq kif filwaqt li dawn qed jgħinu fis-suċċess ekonomiku, huwa fatt ukoll li qed iżommu l-pagi baxxi.
“Filwaqt li napprezzaw il-ħaddiema barranin,” u l-kontribut li dawn jagħtu lill-ekonomija, fl-istess waqt dan ma għandux iwaqqaf it-titjib tal-kwalità tal-ħajja, insista Abela.
Se jkun qed jipproponi li l-impjegaturi ma jingħatawx il-permess li jimportaw ħaddiema barranin jekk l-impjegati tagħhom ma jkollhomx pagi xierqa.
Lanqas mhu se jingħataw il-permess jekk ma jħallsux lill-ħaddiema barranin permezz ta’ kont bankarju validu.
Mill-banda l-oħra, insista li lanqas mhu se jaċċetta li ħaddiema barranin jitħallsu inqas mill-kollegi tagħhom Maltin.
Dwar l-ambjent, Robert Abela wiegħed li fuq perjodu ta’ ħames snin, il-Gvern se jkun qed jiżra varjetà ta’ siġar madwar il-gżira.
Robert Abela u Chris Fearne huma l-kandidati għall-Mexxej Laburista. Il-votazzjoni se ssir nhar is-Sibt 11 ta’ Jannar, bil-voti jingħaddu l-għada, 12 ta’ Jannar.
