In-Nunzju Appostoliku l-ġdid għal Malta jippreżenta l-Kredenzjali lill-President

Dalgħodu il-President George Vella laqa’ lin-Nunzju Appostoliku l-ġdid għal Malta, Savio Hon Tai-Fai. 

Wara l-preżentazzjoni formali tal-Ittri ta’ Kredenzjali tiegħu, in-Nunzju Appostoliku wassal it-tislijiet f’isem il-Papa Franġisku lill-President Vella u lill-poplu Malti u Għawdxi. Enfasizza wkoll ir-relazzjonijiet amikevoli u li ilhom għal żmien twil bejn Malta u l-Vatikan.

Il-President Vella fakkar iż-żjara f’Malta mill-Papa Franġisku u qal li l-poplu Malti, kif ukoll id-diversi komunitajiet barranin preżenti, kienu kuntenti ferm li jilqgħu u f’għadd ta’ każijiet, jiltaqgħu wkoll personalment mal-Papa.

Matul il-laqgħa, ġew diskussi wkoll l-iżviluppi fir-reġjun tal-Mediterran kif ukoll l-aktar sitwazzjoni reċenti fl-Ukrajna.