Misteru madwar qlajjiet li l-Membru Parlamentari veteran tal-Partit Nazzjonalista f'Għawdex, Chris Said, mhux se jikkontesta l-elezzjoni ġenerali li jmiss, jibqgħu b'saħħithom wara li l-MP irrifjuta li jikkonferma jew jićħad.
Is-Sibt li għadda, The Malta Independent irrappurtat li Said ġie ddikjarat li mhux se jikkontesta l-elezzjoni li jmiss waqt li kien qed jindirizza attività tal-PN fil-każin tal-PN f'Ta' Sannat.
Iżda fl-edizzjoni tal-lum ta' GozoToday, Said irrifjuta li jikkonferma l-intenzjonijiet tiegħu.
“Ma nifhimx għalfejn The Independent irrappurtaw dak li rrappurtaw,” qal Said. “Meta nieħu deċizjoni dwar il-futur tiegħi, inkun jien li nħabbarha pubblikament.”
Said tenna li l-elezzjoni li jmiss għadha sentejn bogħod u li bħalissa qed jiffoka fuq ix-xogħol tiegħu fil-partit u mal-kostitwenza.
Karriera politika
Chris Said, avukat, twieled fid-9 ta’ Lulju 1970 fin-Nadur, Għawdex, fejn serva bħala sindku għal diversi snin. Anke ħutu, Charles u Edward, okkupaw din il-kariga.
Said kien elett fil-parlament fl-2008 u ġie appuntat segretarju parlamentari għad-djalogu pubbliku u l-informazzjoni fl-Uffiċċju tal-Prim Ministru minn Lawrence Gonzi.
F’Settembru 2010, hu rriżenja mill-kariga wara xi akkużi, iżda, xahar wara, ismu ġie mnaddaf minn dawn l-akkużi.
F’Jannar 2012, wara r-riżenja ta’ Carm Mifsud Bonnici mill-kariga ta' ministru, Said ġie appuntat bħala Ministru għall-Ġustizzja u l-Familja.
Wara t-telfa tal-PN fl-elezzjoni tal-2013, Said ġie elett bħala Segretarju Ġenerali tal-partit. Fl-2015, ma reġax ikkontesta l-kariga fuq talba tal-mexxej tal-PN ta’ dak iż-żmien, Simon Busuttil, biex jiffoka fuq ix-xogħol tiegħu f’Għawdex għall-elezzjoni li kienet ġejja.
Wara t-telfa tal-PN fl-elezzjoni ġenerali tal-2017, Said ikkontesta l-elezzjoni għall-mexxej tal-partit u spiċċa fit-tieni post wara Adrian Delia. Delia mbagħad għażel lil Said biex ikun il-kelliem tal-Oppożizzjoni għall-Għawdex u r-Riformi Kostituzzjonali.
Said reġa’ kien elett fuq id-distrett ta' Għawdex fl-elezzjoni ġenerali tal-2022, iżda l-prestazzjoni tiegħu kienet imtappna mill-politiku ġdid Alex Borg, li kiseb it-tieni l-ogħla għadd ta' voti tal-ewwel għadd wara Clint Camilleri tal-Partit Laburista.
Riċentement, Said insista li l-Ministeru għal Għawdex għandu jinżamm, iżda ppropona wkoll li jiġi stabbilit kunsill ad hoc bħala l-eżekuttiv ewlieni ta’ Għawdex, li jieħu d-deċiżjiet prinċipali tal-gżlira.
Huwa għamilha ċara li din il-proposta dwar qsim tal-poter kienet tiegħu, mhux tal-Partit Nazzjonalista.
