Il-Parlament se jkun qed jiddiskuti iż-żieda fil-għoli tal-ħajja u l-ħtieġa ta' intervent mill-Gvern il-ġimgħa d-dieħla, wara mozzjoni tal-Oppożizzjoni li kienet ippreżentata nhar il-Erbgħa.
"Għax il-Gvern Laburista hu tant barra mir-realtajiet li qed jiffaċċjaw il-familji, in-negozji u s-self-employed, kellu jkun il-Partit Nazzjonalista li sejjaħ għal diskussjoni parlamentari urġenti fuq iż-żieda fil-għoli tal-ħajja u l-miżuri meħtieġa biex itaffu l-piż tagħha fuq ħafna," qal il-Partit Nazzjonalista qal.
Id-dibattitu se jsir waqt is-sessjoni parlamentari allokata lill-Oppożizzjoni nhar il-Ħamis, 13 ta' Frar.
Il-PN qal li l-mozzjoni qed tiġi mressqa fid-dawl ta' żieda fil-prezzijiet ta' oġġetti essenzjali bħal ikel, mediċini, u servizzi, "li qed jaffettwaw b'mod negattiv lil ħafna, speċjalment lil dawk bi dħul baxx u medju."
Il-PN qed jitlob:
-
Li l-aġġustament tal-għoli tal-ħajja (COLA) jingħata kollu kemm hu u jibqa' mingħajr taxxa sabiex il-ħaddiema u l-pensjonanti jkunu jistgħu jibbenefikaw minnu bħal ma hu
-
Li l-gvern jipprovdi krediti ta' taxxa lill-SMEs u n-negozji biex jgħinhom jassorbu żieda fil-pagi mingħajr ma jkollhom ikomplu jogħlew il-prezzijiet
-
Li jitwaqqaf fond nazzjonali biex jipprovdi għajnuna finanzjarja lill-importaturi u l-esportaturi, sabiex jitnaqqsu l-ispejjeż tagħhom
-
Li l-mudell ekonomiku jinbidel abbażi tat-tkabbir sproporzjonat tal-popolazzjoni, għal wieħed li jinvesti f'setturi ekonomiċi ġodda u innovattivi li joffru impjiegi aħjar imħallsa għall-Maltin.
