Il-Partit Nazzjonalista eleġġa lil Charles Bonello bħala s-Segretarju Ġenerali l-ġdid tiegħu waqt laqgħa tal-kumitat eżekuttiv tal-partit li saret ilbieraħ filgħaxija. Bonello kiseb 84% tal-voti, b’ 56 vot favur, 11 kontra, u tliet voti invalidi.
Bonello bħalissa jservi bħala l-President tal-Kulleġġ tal-Kunsillieri Lokali tal-PN u bħala Kunsillier Lokali fil-Fgura, u ilu attiv fil-partit għal bosta snin.
Huwa kellu rwoli importanti taħt amministrazzjonijiet preċedenti tal-PN, inkluż bħala Segretarju Privat tal-eks Prim Ministru u Kap tal-PN Lawrence Gonzi. Barra minn hekk, Bonello kien kandidat għall-elezzjoni ġenerali tal-2017 f’isem il-partit.
Hu se jieħu post Michael Piccinino, li serva bħala Segretarju Ġenerali mill-Lulju tal-2021. Piccinino ħabbar id-deċiżjoni tiegħu li jirriżenja f’Awwissu li għadda sabiex jiffoka fuq il-kandidatura tiegħu għall-elezzjoni ġenerali li ġejja. Il-kandidatura tiegħu ġiet approvata formalment mill-PN f’Diċembru li għadda.
Il-Kumitat Eżekuttiv tal-PN feraħ lil Bonello għall-ħatra tiegħu u esprima l-apprezzament tiegħu lejn Piccinino għad-dedikazzjoni tiegħu matul l-aħħar erba’ snin.
Il-Kap tal-PN Bernard Grech ukoll awgura lil Bonello u stqarr li huwa kunfidenti li s-Segretarju Ġenerali l-ġdid ħa jkun qed jibni fuq il-pedamenti stabbiliti minn Piccinino. Grech qal li, bil-ħidma ta’ kulħadd fil-PN, il-partit se jkompli l-proċess ta’ tiġdid u tisħiħ biex joffri lill-pajjiż il-bidla li għandu bżonn.
