Eunice Grech Fiorini, il-Kap Eżekuttiv tal-Aġenzija għas-Servizzi tal-Qorti, xehdet li l-espert tal-qorti Jeremy Harbinson ma kellu l-ebda kuntratt tax-xogħol meta ġie maħtur fl-inkjesta maġisterjali dwar l-isptarijiet Vitals.
Din ħarġet wara li Fiorini wieġbet il-mistoqsijiet magħmulin mill-avukati difensuri Franco Debono, Mark Vassallo, u Luke Dalli, li qed jirrappreżentaw lill-akkużati fil-każ.
Harbinson, wieħed mill-esperti ingaġġati biex janalizza l-kunċessjoni, kemm-il darba rrifjuta li jixhed fil-proċedimenti tal-każ.
Harbinson mexxa tim ta’ 30 espert li pproduċa rapport voluminuż ibbażat fuq l-analiżi ta’ diversi dokumenti, bħal tranżazzjonijiet bankarji. Ir-rapport ta’ 1,200 paġna kien l-unika bażi fuqiex il-maġistrat inkwirenti waslet għall-konklużjonijiet tagħha.
L-inkjesta tal-Vitals irrakkomandat azzjoni kriminali kontra l-eks Prim Ministru Joseph Muscat, l-eks ministru Konrad Mizzi, u l-eks Chief of Staff tal-Uffiċċju tal-Prim Ministru Keith Schembri fuq akkużi ta’ korruzzjoni u ħasil ta’ flus. L-inkjesta ħarġet ukoll rakkomandazzjonijiet li jitressqu fuq akkużi inqas serji l-eks ministri Edward Scicluna u Chris Fearne, kif ukoll tliet eks segretarji permanenti.
Bosta propjetarji ta’ kumpaniji Maltin u barranin, kif ukoll l-accountants u l-avukati tagħhom, ukoll ġew mixlija b’diversi reati, inkluż il-ħasil ta’ flus. L-akkużati kollha wieġbu li mhumiex ħatja.
Fis-seduta preċedenti li saret fis-27 ta’ Frar, l-avukati tad-difiża li qed jirrappreżentaw lill-akkużati fil-każ tal-isptarijiet talbu lill-qorti biex ma tqisx ir-rapport ta' Harbinson fid-deċiżjoni dwar l-appell tal-ordni ta’ ffriżar tal-assi. Dan għaliex Harbinson bagħat affidavit lill-Qrati fejn indika r-rifjut tiegħu li jixhed fil-proċedimenti minħabba biża’ għas-sigurtà tiegħu.
Il-każ ġie aġġornat għat-8 ta’ April, fejn tliet esperti oħrajn huma mistennija jixhdu mill-bogħod. L-imħallef li qed tmexxi l-każ qalet li l-qorti ma kellhiex l-indirizzi fissi tal-esperti.
Tnejn minnhom ġew infurmati, u d-dokumenti ntbagħtulhom permezz ta’ email.
Joseph Muscat qed jirrappreżentawh l-avukati Vincent Galea, Luke Dalli, Ishmael Psaila, Charlon Gouder, u Etienne Borg Ferranti.
Konrad Mizzi u Keith Schembri qed jirrappreżentawhom l-avukati Edward Gatt, Mark Vassallo, u Shaun Zammit.
L-avukati Gianella De Marco u Charles Mercieca qed jirrappreżentaw lil David J Meli.
L-avukati Stefano Filletti u Franco Debono qed jirrappreżentaw lil Alfred Camilleri.
