Il-Partit ADPD qed jakkużaw kemm lill-Partit Laburista kif ukoll lill-Partit Nazzjonalista li qed jaqdu biss l-interessi tagħhom stess.
L-akkużi huma relatati mat-tibdil propost fid-distretti elettorali, li wassal għal dibattitu sħiħ dwar il-proċess u l-motivazzjonijiet warajh.
Fil-fatt, l-ADPD qed jgħidu li r-rapport li ppubblikaw il-membri tal-Kummissjoni Elettorali nominati mill-PL, kif ukoll ir-rapport minoritarju mill-membri nominati mill-PN, juru kif iż-żewġ partiti qed jipproponu distretti li jiffavorixxu l-partit tagħhom stess.
Is-Segretarju Ġenerali tal-ADPD Ralph Cassar qal li dan il-proċess jikkonferma kemm is-sistema elettorali hija dgħajfa u miftuħa għall-manipulazzjoni politika.
"L-istorja wriet li kull darba li wieħed minnhom kien fil-gvern dejjem lagħbu bid-distretti kif kien jaqblilhom," qal Cassar. "F’sistema elettorali tajba l-mod kif jitqassmu d-distretti ma jagħmilx differenza għall-eżitu tal-elezzjoni."
Min-naħa tagħha, iċ-Chairperson tal-ADPD Sandra Gauci enfasizzat li dan hu eżattament għaliex il-partit tagħha qed jikkontesta s-sistema elettorali fil-Qorti.
Hija saħqet li l-voti f’Malta mhumiex kollha ugwali, u li l-bidliet proposti fid-distretti elettorali jikkonfermaw kemm il-PL u l-PN huma kuntenti jħallu s-sistema kif inhi l-aqwa li jkunu jistgħu jdawruha favurihom.
“It-tnejn li huma kuntenti għax jafu li meta tiġi d-daqqa tagħhom iħawdu u jimmanuvraw biex jipprova jgawdi l-partit tagħhom,” temmet Gauci.
Il-PN jikkundanna l-proposti tal-PL
Min-naħa tiegħu, il-Partit Nazzjonalista qal li se jivvota kontra l-bidliet proposti mill-membri tal-Kummissjoni Elettorali nominati mill-PL, għax dawn qed jaqsmu diversi lokalitajiet u jdgħajfu l-vuċi tar-residenti.
Birkirkara, per eżempju, li s’issa kienet parti mit-Tmien Distrett, issa se tiġi maqsuma bejn it-Tmien u l-Ewwel Distrett. Bl-istess mod, Tal-Pietà se tkun trasferita mill-Ewwel għad-Disa’ Distrett, parti min-Naxxar se tingħaqad mat-Tmien Distrett, u Wied il-Għajn se tinqasam bejn it-Tielet u t-Tieni Distrett.
Il-PN ppreżenta rapport minoritarju li jirrifjuta dan l-arranġament, u biex minflok il-lokalitajiet jibqgħu sħaħ f’distrett wieħed.
Skont il-PN, il-proposti tal-PL qed iħallu lir-residenti ta' diversi rħula maqsumin f’żewġ distretti differenti, u għalhekk qed idgħajfu l-influwenza tagħhom.
L-Oppożizzjoni qalet li l-bidliet ħa jsaħħu r-rappreżentanza, mhux ibaxxuha.
Il-kuntest tat-tibdil
Il-Kostituzzjoni Maltija tistabbilixxi li l-popolazzjoni f’kull distrett ma tistax tvarja iktar minn 5% minn distrett għal ieħor, u għalhekk ir-reviżjoni tad-distretti hija perjodikament meħtieġa.
Iżda l-kritika immirata lejn ir-reviżjoni qed tqajjem dubji dwar jekk dan il-proċess hux verament qed isir biex tissaħħaħ id-demokrazija, jew jekk hux qed jintuża bħala għodda politika biex jiffavorixxi l-partiti l-kbar.
