Il-Qorti f'Għawdex ordnat lil raġel iħallas €83,000 lil bintu wara li sabitu ħati li kkawżalha problemi psikoloġiċi permezz ta' krudeltà u negliġenza.
Ir-raġel ċaħad l-allegazzjonijiet li saru kontrih. Huwa allega li omm it-tifla, li hu sseparat legalment minn magħha kienet qed timmanipula lit-tifla. Madanakollu l-vittma tat x-xhieda tagħha kontra l-aġir ta' missierha - aġir abbużiv u xi drabi vjolenti. Konsegwenza ta' dan l-abbuż batiet anke fuq livell akkademiku tant li hija rnexxilha ġġib l-O levels tagħha tal-età ta' 20 sena.
Omm il-vittma kkonfermat ix-xhieda ta' bintha, filwaqt li eks għalliema tal-vittma qalet li meta kienet żgħira l-mara kienet turi sintomi ta' ansjetà fl-iskola.
Il-mara qalet li missierha kien ta' spiss jirredikolaha għaliex kienet tbati minn piż żejjed. Huwa kien saħansitra vvinta taqbila dwar il-piż tagħha - "ħoxna ħoxna qisek katuba, par widnejn kbar qishom qlugħ, imnieħrek ċatt, denbu nnukklat, għal qatla jieħduh." Barra minn hekk il-mara kompliet tirrakkonta l-abbuż li għaddiet minnu hekk kif qalet li meta twieldet oħtha żgħira kien isakkarha fuq il-bejt mingħajr ikel u jagħti l-ġugarelli tagħha lil oħtha.
Skont il-Maġistrat Vella Cuschieri, il-mara sofriet abbuż emozzjonali u kellha livell ta' diżabilità psikoloġika ta' 8% - hekk kif ikkalkulat mill-esperti tal-qorti.
Il-missier ġie ordnat iħallas €82,984 f'danni lil bintu.
