Jinqabdu aktar minn 230,000 sigaretti tal-kutrabandu

Inqabdu 230,320 sigaretti tal-kuntrabandu u 400 sigarru tal-kuntrabandu riżultat ta’ tfittxijiet li saru kemm hekk kif kienu deħlin fil-pajjiż kif ukoll f’numru ta’ stabbilimenti fis-suq. Dawn is-sigaretti kienu intenzjonati se jiddaħħlu, jew li kienu laħqu ddaħħlu f’Malta bil-kuntrabandu.

Il-qabdiet waqt id-dħul kienu jammontaw għal 147,000 sigarett u 400 sigarru tal-kuntrabandu u inqabdu fil-portijiet wara tfittxija fuq numru ta’ vapuri, fl-ajruport wara tfittxija fil-bagalji ta’ passiggieri li waslu Malta, u fil-Posta u l-Courier wara tfittxija f’numru ta’ pakketti.

Il-qabdiet fis-suq kienu jammontaw għal 83,320 sigarett tal-kuntrabandu u inqabdu wara tfittxijiet f’numru ta’ ħwienet, stabbilimenti, każini, garaxxijiet u vetturi, f’diversi lokalitajiet madwar Malta.

Sadanittant, id-Dipartiment tad-Dwana innota li fil-ġimgħat li għaddew infiltraw fis-suq Malti ammonti żgħar ta’ sigaretti bil-marka American Legend, Tradition u Manchester li ritratt tal-pakketti tagħhom jidher hawn isfel.

Id-Dwana tixtieq tavża li dawn it-tip ta’ sigaretti ma jinbiegħux fis-suq Malti, ma ddaħħlux fil-pajjiż b’mod legali u għaldaqstant it-taxxi fuqhom ma tħallsux. Tfakkar li skont ir-Regolamenti tat-Tabakk Manifatturat:  ħadd ma jista’ jakkwista jew ikollu fil-pussess tiegħu sigarretti jew xi prodott tat-tabakk ieħor li fuqhom ma jkunux tħallsu t-taxxi; ma għandhom jiġu offruti għal konsum ebda sigarretti kemm-il darba il-pakkett ma jkunx issiġillat b’bolla maħruġa mid-Dwana; kull kwantità ta’ sigarretti jew tabakk li jinstabu fil-pussess ta’ persuna bi ksur tar-regolamenti tiġi konfiskata favur il-Gvern; u l-multa minima għal min jinqabad b’pussess ta’ sigaretti tal-kuntrabandu, hu kemm hu żgħir l-ammont, hija ta’ €250 minbarra t-taxxi involuti.

Għaldaqstant, id-Dipartiment tad-Dwana javża illi se jkun qiegħed jinżel bis-saħħa kollha li tagħtih il-liġi fuq kull min qiegħed idaħħal, jaħżen, ibiegħ, imexxi jew ikollu fil-pussess tiegħu dawn it-tip ta’ sigaretti. Fil-fatt, il-Pulizija u l-forzi tal-ordni l-oħra għandhom il-poter li jieħdu passi kontra kull min jinstab b’pakkett sigaretti tal-kuntrabandu.

Javża wkoll li kull min għandu xi informazzjoni dwar bejgħ jew pussess ta’ dawn it-tip ta’ sigaretti jista jirrapporta fuq 25685124 anki b’mod anonimu.