Raġel ta’ 45 sena residenti Birżebbuġa tilef ħajtu wara li kien involut f’inċident tat-traffiku fi Triq Għajn Tuffieħa, l-Imġarr, illum għall-ħabta tal-għaxra neqsin kwart .
Minn investigazzjonijiet preliminari li saru mill-Pulizija tad-Distrett tal-Mosta, jidher li għal xi raġuni kien hemm impatt bejn mutur u xarabank li kienu qed jinstaqu f’direzzjonijiet opposti.
Ir-raġel ta’ 45 sena kien qiegħed isuq mutur tat-tip Honda CB filwaqt li x-xarabank kienet qiegħda tinstaq minn ġuvni ta’ 22 sena, residenti Ħaż-Żebbuġ.
Fuq il-post issejjaħ tim mediku u marru wkoll Pulizija mir-Rapid Intervention Unit u mis-Sezzjoni tat-traffiku sabiex jassistu.
Sfortunatament is-sewwieq tal-mutur ġie ċċertifikat mejjet fuq il-post.
Bil-każ ġie infurmat ukoll il-Maġistrat tal-Għassa Dr I Farrugia LL.D li ordna li ssir inkjesta u ħatar diversi esperti sabiex jassistuh.
It-triq bħalissa tinsab magħluqa għat-traffiku filwaqt li l-investigazzjonijiet tal-Pulizija għadhom għaddejjin.
