24 arrestati fuq droga….5 rriżultaw pożittivi għall-breathalyzer test f'Għawdex

Matul dawn l-aħħar tlett ijiem, f’ħidma konġunta bejn il-Pulizija mid-Distrett ta’ Għawdex u l-Pulizija mill-Iskwadra ta’ kontra d-Droga, ġew arrestati 24 persuna li fil-pussess tagħhom instabu sustanzi suspettati kannabis, kokaina kif ukoll ecstasy.

Il-Pulizija mid-Distrett t’Ghawdex wettqet ukoll diversi roadchecks fejn ġew imwaqqfa diversi vetturi. Fosthom kien hemm 5 sewwieq li rriżultaw pożittivi għall-breathalyzer test.

Apparti minn hekk, l-Iskwadra ta’ kontra d-Droga assistita mill-Pulizija mill-Iskwarda tar-Rapid Intervention Unit u mis-Sezzjoni tal-Klieb, għamlu diversi roadchecks madwar Malta fejn ġew arrestati 8 persuni.

Fil-pussess ta’ 7 persuni li ġew arrestati nstabu sustanzi suspettati kannabis, kokaina kif ukoll ecstasy.  Filwaqt li l-persuna l-oħra diġa tressqet il-Qorti fuq akkuzi relatati ma’ pussess aggravat ta’ droga kokaina.