Johann Saliba ta’ 37 sena, Adrian Pace ta’ 22 u Matthew Micallef ta’ 21 sena ammettew l-akkużi ta’ krudeltà fuq l-annimali miġjuba kontrihom mill-Ispetturi Roderick Agius u Colin Schembri.
L-akkużi li l-irġiel ikkawżaw sofferenza mhux neċessarja fuq annimal, li trattaw annimal li kien taħt il-kura tagħhom b’mod mhux xieraq u li ma żammewx annimal f’kundizzjonijieti xierqa saru fid-dawl ta’ arrest li seħħ ilbieraħ filgħodu dwar ġlied tas-sriedak fil-Ħandaq.
Dawn it-tip ta’ offiżi jġibu kastig f’forma ta’ multa bejn l-€1000 u l-€55,000 flimkien ma' piena massima ta’ 3 snin ħabs.
L-Ispettur Roderick Agius spjega lill-Maġistrat Gabriella Vella, li lbieraħ, il-Pulizija kienu nfurmati li f’razzett fil-Ħandaq, kienu qed isir ġlied illegali tas-sriedak. Wara xi stħarriġ, il-Pulizija daħlu fir-razzett, fejn sabu numru ta’ nies, sostna l-Ispettur.
Minn investigazzjonijiet tal-Pulizija irriżulta li t-tliet akkużati kien ilhom xi xhur jipprattikaw il-ġlied tas-sriedak. Il-Pulizija setgħu jaraw filmati tal-ġlied miġbudin bil-mobile ta’ wieħed mill-akkużati.
L-avukat difensur ta’ Matthew Micallef saħaq li filwaqt li l-klient tiegħu kien preżenti għall-ġlied, ma kienx responsabbli mill-organizzazzjoni tagħhom, avolja l-filmati tal-ġlied li “uħud iqisuhom sports u oħrajn le,” instabu fuq il-mobile tiegħu.
L-avukat ta’ Micallef qal li l-klient tiegħu ammetta li kien ġieli ħa sehem fil-ġlied u li jiddispjaċih.
“Huwa ammetta dan anke waqt l-interrogazzjoni lbieraħ. Li kont sorpriż huwa li tressqu biss tliet persuni, meta l-istampa rrappurtat madwar 30 persuna nvoluta,” sostna l-avukat, filwaqt li talab il-ħelsien mill-arrest ta’ Micallef peress li kien lest jgħin lill-Pulizija fl-investigazzjoni.
L-avukat Franco Debono, li deher flimkien mal-avukat Amadeus Cachia għal Johann Saliba, argumenta li din kienet l-ewwel offiża ta’ Saliba u li huwa kien qiegħed biss jassisti għall-ġlied tas-sriedak. Debono talab lill-Qorti tikkunsidra wkoll li Saliba ammetta l-akkużi u li għaldaqstant il-piena għandha tkun minima.
L-avukat Ludwig Caruana, li ddefenda lil Adrian Pace qal li l-krimini ma kienx wieħed aggravat, hekk kif ma kienx hemm imħatri nvoluti u li ma kienx Pace li organizza l-ġlied, avolja seta’ kien ħa sehem f'xi ġlied li seħħew ġranet qabel.
Il-Prosekuzzjoni ma oġġezzjonatx għall-ħelsien mill-arrest tat-tliet irġiel. Il-Qorti ħabbret li s-sentenza se tinqata’ għada filgħodu, hekk kif ħelset lit-tliet irġiel fuq garanzija personali ta’ €10,000.
