Jinżamm arrestat għax ried jagħmel is-sess flok massaġġ

Somalu ta’ 22 sena nżamm arrestat wara li allegatament kiser sieq mara f’post tal-massaġġi f’Tas-Sliema.

Il-każ seħħ fl-14 ta’ Jannar li għadda f’ħanut fi Triq Manuel Dimech meta l-akkużat ippretenda li l-mara tagħmel is-sess miegħu u allegatament kisrilha sieqha meta pprova jistupraha.

Il-mara dehret fil-Qorti fuq siġġu tar-roti akkumpanjata minn membri tal-familja.

Hija qalet li l-akkuża kien ħallas għal massaġġ iżda f’mument minnhom qam, sakkar il-bieb, qattalha l-qalziet u beda jisforza lilu nnifsu biex iwettaq l-att sesswali.

Il-Qorti ma laqgħatx it-talba għall-ħelsien mill-arrest u s-Somalu nżamm arrestat.