Ivanovic, klijent li kera SUV mingħand No Deposit Cars, irmonkawlu u ħadulu l-vettura lura f’Awwissu 2022 u lemaħ l-istess vettura qed tinstaq minn uffiċjal tal-LESA sentejn wara.
Ivanovic ippreżenta protest ġudizzjarju kontra l-eks direttur ta’ No Deposit Cars Christian Borg u d-direttur preżenti tiegħu Joe Camenzuli, kif ukoll No Deposit Cars Malta Ltd u l-kumpanija Princess Holdings Ltd.
L-avukati Jason Azzopardi u Kris Busietta sostnew li permezz ta’ tracking device moħbi fil-vettura kien ippermetta lill-kumpanija tkun taf fejn tinsab il-karozza fi kwalunkwe ħin. L-użu ta’ din il-prattika kienet ikkawżat lil Ivanovic isofri biża’, stress u ansjetà, qalu l-avukati.
Il-protest ġudizzjarju jgħid li meta sar ir-rapport tal-pulizija dwar il-karozza misruqa, l-uffiċjali li kienu qed jaħdmu fl-għassa ta’ Birkirkara kienu rrifjutaw li jaġixxu, u qalulu li dak li seħħ ma kienx reat kriminali.
Kienet din l-attitudni mill-forzi tal-ordni li ppermettiet lil Borg u lil sħabu fin-negozju biex ikomplu jaġixxu b’“impunità”.
Ikompli jgħid li fi Frar, b’sorpriża kbira, Ivanovic kien lemaħ il-karozza li kellha l-istess pjanċi tan-numri, issa bil-logo tal-LESA, qed tinstaq minn uffiċjal tal-infurzar tal-LESA fil-Mellieħa. Reġa’ raha f’April, misjuqa minn uffiċjal tal-LESA f’Ħ’Attard.
L-avukati tar-raġel qed jargumentaw li klawsoli fil-ftehim kien hemm ksur tal-liġi ċivili u kriminali, ksur fil-protezzjoni tal-konsumatur u l-leġiżlazzjoni tal-privatezza.
Dawn l-azzjonijiet kienu wasslu lir-raġel ibati danni materjali u morali, u indikaw li Borg u sħabu kienu involuti f’ħasil ta’ flus, frodi, serq u konfoffa kriminali.
Ivanovic qal li kien diġà nforma lill-Kummissarju tal-Pulizija b’dan kollu, billi ressaq ilment kriminali dwar dawn l-allegazzjonijiet sabiex ikunu jistgħu jittieħdu passi kriminali fil-konfront ta’ Borg u sħabu.
Biex iżid l-insult mal-korriment, il-vittma rċieva kont ta’ €388 għal ħlasijiet ta’ rmonk.
Borg u sħabu diġà huma s-suġġett ta’ proċeduri kriminali li għaddejjin fejn huma mixlija li ħatfu u heddew raġel ieħor.
Huwa qed jiġi akkużat ukoll li impjega illegalment ċittadini mhux tal-UE fi car wash u qed jiffaċċja kawża ċivili mressqa kontra No Deposit Cars minn aktar minn 70 klijent li jsostnu li ġew froditi, li 26 minnhom ippreżentaw ukoll protest ġudizzjarju separat fejn jitolbu investigazzjoni tal-pulizija dwar allegata frodi u evażjoni tat-taxxa minn Borg.
Borg huwa rrappurtat li ta’ spiss ftaħar li ma jintmessx minħabba l-ħbiberija u l-konnessjonijiet kummerċjali tiegħu mal-Prim Ministru, peress li kien ukoll klijent tal-uffiċċju legali ta’ Robert Abela u uffiċjali oħra tal-gvern.
