Żewġ nassaba ġew ikkundannati għal sentenza ta’ libertà kkundizzjonata għal sena wara li nstabu ħatja li ħebbew u darbu ħafif żewġ membri ta’ BirdLife Malta fi żona qrib il-Magħtab tliet snin ilu.
Il-Kap Eżekuttiv ta’ BirdLife Malta, Mark Sultana, wera t-tħassib tiegħu dwar kif in-nuqqas ta’ evidenza minn naħa tal-Pulizija ppermetta lill-aggressuri biex jevitaw il-konsegwenzi kollha ta’ għemilhom.
“BirdLife Malta hija familjari mal-liġijiet u r-regolamenti, u aħna nżommu magħhom b’mod strett, flimkien mal-protokolli interni tagħna maħsuba biex jipproteġu l-benesseri tal-membri tat-tim tagħna fuq il-post. Linqas li nistennew huwa kooperazzjoni sħiħa mill-Pulizija meta jseħħu dawn l-inċidenti sabiex issir ġustizzja. In-nuqqas ta’ evidenza li l-aggressuri ġew infurmati fil-ħin ippermettilhom jevitaw il-konsegwenzi kollha ta’ għemilhom. Se tintbagħat ittra lill-Kummissarju tal-Pulizija dwar din il-kwistjoni.”
L-inċident seħħ qrib il-Magħtab, meta tim ta’ BirdLife Malta kien miexi fi triq pubblika ħdejn boatyard u rrapporta nsib illegali fl-Għallis. Il-Pulizija rrispondew għalih b'mod immedjat. Meta t-tim kien sejjer lura lejn il-vettura tiegħu bil-mixi, żewġt irġiel ħarġu mill-boatyard, bdew joffendu lill-istaff ta’ BirdLife Malta u bdew jiffilmjawhom.
Meta membru tat-tim beda jirrekordja l-inċident għas-sigurtà tagħhom, wieħed mill-aggressuri pprova jaħtfilha l-mowbajl u darabha ħafif fil-proċess. L-ieħor imbutta membru ieħor tat-tim ma’ ħajt tas-sejjieħ u pprova jtiha daqqa ta’ ponn, u kkawża ġrieħi ħfief ukoll.
L-inċident ġie rrappurtat l-għassa tal-Pulizija tan-Naxxar, b’evidenza li inkludiet ċertifikati mediċi u ritratti mill-post tal-aggressjoni.
Il-Maġistrat Yana Micallef Stafrace sabet liż-żewġ irġiel, Joseph Grech u Carmel Grech, ħatja li darbu ħafif lit-tim. Madankollu, huma ġew lliberati mill-akkużi relatati mal-imbuttar, l-abbuż verbali u t-theddid peress li l-Pulizija naqset milli tipprovdi evidenza li l-aggressuri ġew infurmati kif suppost fi żmien it-tliet xhur stabbiliti bil-liġi. Dawn l-akkużi għalhekk tqiesu bħala preskritti.
Joseph Grech u Carmel Grech ingħataw sentenza ta’ libertà kkundizzjonata għal sena.
