Raġel ta’ 67 sena residenti Ħad-Dingli kien arrestat mill-Pulizija wara li investigazzjonijiet bejn il-Pulizija u JobsPlus sabu illi kien qed allegatament iddaħħal f’Malta b’mod illegali numru ta’ persuni minn pajjiżi terzi.
Minn investigazzjonijiet irriżulta li r-raġel kien għamel applikazzjonijiet sabiex iġib u fil-fatt ġab Malta għadd ta’ ħaddiema prospettivi iżda qabeż ferm id-domanda reali ta’ ħaddiema li kellu bżonn in-negozju tiegħu biex jopera.
Allegatament huwa għamel dikjarazzjonijiet foloz lill-awtoritajiet kompetenti, billi stqarr li għandu bżonn dan in-numru ta’ ħaddiema sabiex ikun jista’ jopera tliett ristoranti, meta wieħed minnhom kien fil-proċess li jagħlaq u ieħor kien għadu ma fetaħx.
Ir-raġel inżamm fil-lock-up tal-Pulizija, il-Furjana, sakemm tressaq il-Qorti llum għall-ħabta tas-1pm, quddiem il-Maġistrat Monica Vella akkużat bi traffikar ta’ persuni, dikjarazzjonijiet foloz u esplojtazzjoni, fost oħrajn.