Joseph Muscat iħassar kollox minn fuq il-mowbajl qabel raid tal-pulizija, jgħid espert tal-qorti

L-Eks Prim Ministru Joseph Muscat ħassar kollox minn fuq il-mowbajl personali tiegħu qabel saret raid tal-pulizija fir-residenza tiegħu ta’ Burmarrad, ingħad fil-qorti nhar l-Erbgħa.

L-espert tal-qorti Keith Cutajar ta xhieda li Muscat fittex darbtejn fuq l-internet kif “jitħassru” diskussjonijiet fuq l-applikazzjoni Whatsapp.

Hu kien qed jagħti x-xhieda tiegħu fil-każ kontra Muscat u oħrajn, rigward il-każ tal-Vitals. Cutajar ġie maħtur sabiex jiftaħ b’kull mod possibli l-mowbajl ta’ Muscat wara li hu rrifjuta li jiftħu għall-investigaturi.

Il-mowbajl beda jirrikordja attività minn Diċembru tal-2022, b’attività iżjed mis-soltu fit-28 ta’ Diċembru. Skont Cutajar, dan l-ammont straordinarju t'attivita’ tfisser li d-data tħassret minn fuq il-mowbajl dakinhar, u dak li tħassar qabel din il-ġurnata kien imħassar manwalment b’ mod volontarju.

Keith Cutajar qal lill-qorti li 35GB t’informazzjoni li kienet tħasret ġiet rkuprata. Intużaw strumenti bħal data mining u recovery software sabiex tiġi rkuprata din l-informazzjoni li ġiet mħassra.