Suldat jitkeċċa mill-armata u ieħor tnaqqaslu l-grad

Suldat wieħed jitkeċċa mill-Forzi Armati ta' Malta wara l-ħtif ta' 132kg kannabis mill-barracks ta' Ħal Safi, b'55 akkuża mqajma kontra 6 membri tal-AFM

Ritratt: James Bianchi
Ritratt: James Bianchi

Suldat tkeċċa mill-Forzi Armati ta' Malta wara proċeduri interni relatati mal-ħtif tad-droga mill-barracks ta' Ħal Safi. Fi Frar li għadda, persuni serqu kwantità kbira ta’ ražin tal-kannabis mill-barrakki tal-AFM.

Inkjesta ministerjali dwar l-inċidrent żvelat li suldat inkarigat mill-monitoraġ tal-kameras tas-sigurtà dakinhar tas-serqa kien qed jara film fuq it-tablet tiegħu. Suldat ieħor li kellu jkun qed josserva kien rieqed ghal madwar sagħtejn u ma ndunax li s-sieħeb tiegħu ma kienx attent.

Kelliem tal-AFM ikkonferma nhar il-ħamis li 55 akkuża kienu mqajma kontra sitt membri tal-AFM ta’ gradi differenti, li kollha nstabu ħatja. Madanakollu, il-kelliem irrimarka li persuna waħda biss tkeċċet mill-AFM, filwaqt li ieħor tniżżel fil-grad.

“B’kollox, is-sitt membri tal-AFM sofrew pieni li jammontaw ghal 134 jum ta’ pagi mitlufa, twissijiet uffiċjali u ċanfir formali,” qal il-kelliem.
Żied li assenjazzjonijiet uffiċjali wkoll tneħħew, “li wasslu ghal telf ta’ allowances u possibilment ostaklu għal promozzjonijiet fil-futur.”

Għadd ta’ persuni qed jinstemgħu fil-qorti wara li wieħed minnhom qed jigi akkużat li seraq kwantità konsiderevoli  minn post li suppost kellu livell gholi ta’ sigurtà. 

Matul is-smigħ fil-qorti, ġie żvelat li s-serqa damet għaddejja ghal aktar minn sagħtejn. Il-qorti semgħet kif inizjalment, l-AFM kienu rrappurtaw li ntilfu t-226kg kollha mid-droga mill-kontenitur, iżda aktar tard, il-forensika tal-pulizija kkonfermat li fil-fatt insterqu 132kg.

L-Ispettur Mark Anthony Mercieca qal fil-qorti li filmati tas-CCTV urewhom nies jiġru lejn il-barracks bejn nofsillejl u s-2:30am. Tnejn mill-akkużati daħlu fil-kontenitur tliet darbiet u dehru joħorġu b’basktijiet tax-xiri.

Il-qorti wkoll semgħet kif Toyota Belta dehret fuq il-CCTV tidhol fil-mini ta’ Ħal Kirkop madwar il-11pm, segwita minn Toyota Vitz sewda.
L-għada filgħodu wara s-serqa, il-Ministru tal-Intern Byron Camilleri offra r-riżenja tiegħu lill-Prim Ministru Robert Abela,  u hu rrifjutaha.

Inkjesta maġisterjali dwar il-każ żvelat nuqqasijiet serji minn dawk responsabbli mis-sigurtà tal-kontenitur filwaqt li sabet ukoll diversi nuqqasijiet fis-sistema tas-sigurtà li kkontribwixxew għas-serqa. Il-Brigadier tal-AFM kien iddeċieda kontra preżenza permanenti tal-Pulizija fuq il-post, billi sostna li kien hemm aktar minn 30 kamera tas-sigurtà, kif ukoll tliet suldati.

Minkejja dawn il-miżuri, is-sistema tas-sigurtà falliet kemm fuq livell attiv (is-suldati u r-rondi) kif ukoll fuq livell passiv (il-fence tal-post).

 

More in Qrati u Pulizija