Il-ħidma li għandu quddiemu l-Arċisqof mhijiex waħda faċli

Irid jara kif se jsib it-triq biex jerġa’ jqajjem l-ispirtu fost il-membri tal-kleru

Irid jara kif se jsib it-triq biex jerġa’ jqajjem l-ispirtu fost il-membri tal-kleru
Irid jara kif se jsib it-triq biex jerġa’ jqajjem l-ispirtu fost il-membri tal-kleru

Hekk kif nhar il-Ġimgħa tħabbar li l-Knisja f’Malta għandha ragħaj spiritwali ġdid bil-ħatra tal-Isqof Charles Scicluna bħala Arċisqof ta’ Malta, ħafna kienu dawk li kkummentaw li din il-bxara kienet mistennija u li ma kinux sorpriżi.

Scicluna ħadem għal żmien twil fil-Vatikan u kellu karigi qrib il-Papa Benedittu XVI, meta kien delegat biex imexxi l-investigazzjoni fuq diversi każi ta’ abbużi sesswali ta’ saċerdoti fuq minorenni jew nisa madwar id-dinja.

Fl-aħħar ġimgħat, waqt li kien qed iservi bħala Amministatur Appostoliku wara r-riżenja ta’ Pawl Cremona, hu kien ukoll inkarigat mill-Papa Franġisku biex iservi bħala President ta’ Kulleġġ speċjali fejn flimkien ma’ erba’ Kardinali u żewġ Isqfijiet oħra se jistudjaw l-appelli mressqa quddiem il-Kongregazzjoni għad-Duttrina tal-Fidi.

L-Arċisqof Scicluna, li għandu 55 sena, qed jieħu f’idejh it-tmexxija tal-Knisja f’mument fejn matul l-aħħar xhur xirfu numru ta’ lmenti minn fost membri tal-kleru li ddikjaraw li hemm bżonn tmexxija ġdida. Kummenti li qajmu diskussjoni sħiħa fil-pajjiż u kritika li kienet primarjament indirizzata lejn it-tmexxija fil-Kurja u dawk li ilhom snin imwaħħlin fl-istess siġġijiet għajr għal xi ċaqliq insinifikanti.

Il-ħidma li għandu quddiemu l-Arċisqof mhijiex waħda faċli. Għandu quddiemu soċjetà li matul l-aħħar snin esprimiet ix-xewqa għad-dħul tad-divorzju. Laqgħet mingħajr tlaqliq id-dħul tal-unjoni ċivili għal persuni tal-istess sess filwaqt li l-attendenza tal-fidili fil-Knisja kompliet tonqos u tonqos.

Scicluna jrid jara kif se jsib it-triq biex jerġa’ jqajjem l-ispirtu fost il-membri tal-kleru. Irid jara kif se jżid l-attendenza fil-ċelebrazzjoni liturġika. Irid jara kif se jsib tarf fil-kwistjonijiet tal-festi fl-ibliet u rħula. Irid jara kif se jagħmel użu aħjar mil-lajċi u jidentifika rwol speċifiku għalihom. Irid jara wkoll kif se jagħmel it-tibdil li ħafna ilhom jgħidu li hemm bżonn fit-tmexxija tal-kurja. Irid jara kif se jindirizza d-defiċit tal-Knisja li preżentement jammonta għal €500,000 defiċit filwaqt li jixpruna l-effiċjenza.

Illum il-poplu qed iħares lejn il-Papa Franġisku bħala l-Papa tan-nies. Papa li qed iżomm ’il bogħod mit-tlellix u r-rikkezzi tal-Vatikan. Papa li qed iressaq il-Knisja viċin in-nies u n-nies viċin il-Knisja billi juża lingwaġġ sempliċi u billi ma jibżax jitkellem fuq suġġetti li ta’ qablu dejjem żammew pass lura milli jitkellmu fuqhom. Il-Knisja tal-Papa Franġisku hija Knisja sempliċi. Knisja b’messaġġ li taf tagħraf u tifhem is-sofferenzi tal-batut. Knisja li lesta tilqa’ fi ħdanha lil kulħadd. Ħafna Maltin u Għawdxin sabu ammirazzjoni lejn il-Papa preżenti għax jaraw fih u t-twemmin tiegħu bħala dak li huma jixtiequ jaraw f’pajjiżna.

L-arċiveskovat ta’ Charles J. Scicluna jrid ikun wieħed frisk u ’l bogħod mix-xinxilli. Arċiveskovat li jgħaqqad il-Knisja u dawk kollha li qegħdin fiha u li jagħraf jindirizza t-tibdil sekulari li s-soċjetà Maltija għaddiet u qed tkompli għaddejja minnu.

More in Socjali