“Sfortunatament, għalkemm il-koppji jkunu għamlu l-kors u dak kollu li hu meħtieġ, u llum huma idonei sabiex jadottaw ilhom kważi sentejn jistennew li jadottaw.” Dan qalitu l-membru parlamentari Paula Mifsud Bonnici f’kumment mal-ILLUM,wara numru ta’ mistoqsijiet parlamentari li għamlet hi stess dwar adozzjonijiet ta’ tfal slovakki minn koppji Maltin. F’kumment ma’ din il-gazzetta Mifsud Bonnici qalet li:
“Sfortunatament, infurmata li dawn il-koppji ġew avżati kemm mill-aġenzija tal-gvern, kif ukoll minn aġenziji oħra li t-terminu ta’ stennija jkun massimu ta’ sitt xhur, u allura kull ġurnata oltrè minn dawn is-sitt xhur il-koppji jarawha eternità.” Min-naħa l-oħra, il-Ministru għall-Familja u Solidarjetà, Michael Farrugia qal li m’hemm l-ebda żmien li koppji Maltin iridu jistennew biex jkunu jistgħu jaddottaw, u wkoll fakkar li l-Konvenzjoni tal-Ajja “titlob li ma jkunx hemm dewmien mhux neċessarju” u li hu kontra din l-istess Konvenzjoni li “ssir xi forma ta’ pressjoni fuq Stat ieħor sabiex jitħaffef il-proċèss ta’ addozzjoni, partikolarment sabiex jinqabżu ċertu proceduri jew sabiex it-tfal li huma fil-bżonn jintbagħtu lejn pajjiż partikolari.”
Jidher ukoll li hemm problema bl-etajiet tat-tfal eliġibbli għall-addozzjoni, minkejja li fil-Memorandum of Understanding li ġie ffirmat bejn iż-żewġ pajjiżi, m’hemmx restrizzjoni fuq l-età tat-tfal li jistgħu jiġu adottati. Mifsud Bonnici ikkummentat li “infurmata li għalkemm il-koppji kienu ntalbu jgħidu x’etajiet jippreferu, jidher li l-Gvern Slovakk ma jagħtix permess sabiex tfal taħt l-erba’ snin jingħataw għall-addozzjoni barra l-pajjiż. Din ukoll tqanqal tensjoni fost il-koppji.”
Mid-data li ġie ffinalizzat tal-Memorandum of Understanding, jiġifieri mit-8 ta’ Awwissu 2014 sat-23 ta’ Marzu 2015 għadhom ma ġew adottati l-ebda tfal mill-Islovakkja. “Meta tikkunsidra li m’hawnx wisq tfal Maltin għall-adozzjoni huwa importanti li nagħmluha aktar faċli għal dawn il-koppji jadottaw tfal minn pajjiżi oħra. Informatal I anke dawn huma limitati meta wieħed jikkunsidra l-Kambodja per eżempju huwa magħluq u sabiex tadotta mir-Russja, per eżempju, l-ħlasijiet jistgħu jammpontaw għal €45,000. Żgur li mhux kull koppja tiflaħ tagħmel dawn il-ħlasijiet.” saħqet Mifsud Bonnici.
“Ghaldaqstant huwa importanti li naraw li ssir aktar faċli li dawn il-koppji jadottaw meta tikkonsidra li apparti dak kollu li jgħaddu minnu dawn il koppji, huma jħallsu spejjeż eżorbitanti” kompliet.
Intant, Farrugia qal li “rigward adozzjonijiet mill-Islovakkja, l-Awtorità Ċentrali f’Malta mhix taffaċċja problemi. Sa issa qatt ma ntbagħtet xi applikazzjoni lill-Islovakkja fejn a priori din ġiet rrifjutata u sadanittant hemm applikazzjoni li waslet fi stadju avvanzat sabiex jiġi adottat l-ewwel minuri Slovakk minn ġenituri f’Malta.”
