Għamel li ried u qered wied, spreġju ambjentali f' Għawdex

Wied Riħan f’ Għawdex spiċċa vittma ta’ sfreġju ambjentali hekk kif bidwi żviluppa trejqa mdaqqsa għall-għalqa tiegħu mingħajr ma l-Kunsill Lokali tan-Nadur kien informat dwar u dan. Dan l-isfreġju wasal biex l-istess kunsill jilmenta mal- Awtorità tal-Ambjent u l-Ippjanar (MEPA) u jsejjaħ għal azzjoni u rimedji.

Mal-ILLUM, is-Sindku tan-Nadur Edward Said ikkonferma dan u qal li dan l-ilment sar din il-ġimgħa stess. Huwa wera t-tama li l-Awtorità tieħu azzjoni mill-aktar fis possibli.

Kif jixhdu r-ritratti li bagħtulna numru ta’ nies li jgħixu jew li jaħdmu l-art fil-viċinanzi, l-ħsara li saret hija konsiderovoli ħafna u jista’ jindika li x-xogħol sar minn makkinarju ta’ kostruzzjoni. Apparti minn hekk huwa ovvju li dan ix-xogħol impatta bl-ikrah id-dehra ta’ wieħed mill-isbaħ widien f’ Għawdex.

Ma’ dan il-ġurnal, Said kompla jgħid kif kunsilli preċedenti kienu oġġezzjonaw għal applikazzjonijiet simili biex ikun hemm żvilupp ta’ trejqa żgħira fl-inħawi. Barra minn hekk, persuni li tkellmu mal-ILLUM qalu li l-bidwi ilu japplika għal dan l-iżvilupp għal dawn tal-aħħar disa’ snin iżda dawn l-applikazzjonijiet ġew miċħuda għal darba, darbtejn mill-MEPA.

Is-Sindku tan-Nadur qal li normalment, il-kunsill jiġi mgħarraf bi żvilupp fil-lokal, u li f’kwalunkwe każ il-kunsill ikun jista joġġezzjona għall-iżvilupp. Dwar l-iżvilupp f’Wied Riħan, Said qal li l-kunsill qatt ma kien infurmat b’ dan l-iżvilupp u kien biss wara bosta lmenti li hu, flimkien ma’ kunsilliera oħrajn, marru fuq il-post biex jaraw x’inhu jiġri. Sussegwentement, il-kunsill lokali għamel rapport lill-MEPA ħamest’ijiem ilu.

Said qal li għandu “suspett kredibbli” f’ persuna partikulari imma ma xtaqx jiżvela ismu ma’ dan il-ġurnal.