L-20 finalista tal-Eurovision isemmgħu leħinhom

Il-Eurovision reġa’ magħna u nammettu jew ma nammettux il-Maltin kollha xi ftit jew wisq jinteressaw ruħhom f’dan il-festival. Hemm min jarah għax tassew fanatiku u hemm min jarah biex jintefa’ jgħaddi siegħa żmien u jgħaddi l-kummenti tiegħu fuq il-mezzi soċjali u forsi wkoll jintefa’ jsib ix-xagħra fl-għaġina biex qatt ma jammetti li għoġbitu xi diska.

Din is-sena l-Eurovision ġie qabel is-soltu. Ma laħqitx għaddiet is-sena tqala sakemm wellidna, b’ħafna qtugħ ta’ nifs, id-diska rebbieħa. Iżda din id-darba se jsir f’Novembru minħabba li l-PBS għażel li ġaladarba se jkun hemm il-palk lest u armat fil-Marsa Ship Building għal Junior Eurovision, nistgħu nieħdu x-xoqqa f’moxtha biex nużawh immedjatament għal tal-kbar.  

Dan il-ġurnal staqsa erba’ mistoqsijiet lill-20 finalista li ntgħażlu fuq Xarabank fit-3 t’Ottubru. Il-mistoqsijiet kienu: 

1. Iddeskrivi d-diska tiegħek fi tliet kelmiet...
2. X’qed tistenna minn din il-parteċipazzjoni tiegħek fil-Eurovision? 
3. Liem hi d-diska favorita tiegħek fil-festival? 
4. X’hemm differenti fid-diska tiegħek li jagħmilha differenti mill-oħrajn?

Ir-risposti qegħdin fl-ordni li biha tħabbru l-kanzunetti finalisti fuq il-programm Xarabank. 

Glen Vella – Breakaway 

B’saħħitha, tal-widna, movimentata. 

L-iktar ħaġa importanti hu li nagħti preżentazzjoni tajba tal-kanzunetta u li nwassal il-messaġġ pożittiv lill-udjenza u lit-telespettaturi waqt li wkoll nittama li nilħaq l-aspettazzjonijiet tal-ġurija.

Ma nistax niġġudika fuq minuta, u wieħed għandu jiġġudika fis-serata finali. Iżda mill-ftit li smajt id-diska ta’ Amber, ta’ Franklin, ta’ Christabelle u ta’ Chris Grech għoġbuni. 

Naħseb li hija diska tajba u li togħġob lill-poplu Ewropew. 

Trilogy – Chasing a Dream 

Diska Symphonic Rock

Bħala riżultat ma tista’ tistenna xejn għax l-opinjoni tal-ġurija hija suġġettiva. L-aktar ħaġa importanti hi li l-prestazzjoni tkun tajba u preċiża kemm jista’ jkun. L-aspettativa tagħna hi li nagħtu wirja mużikali tajba kif jixraq fi spettaklu ta’ dan il-kalibru. Bħal dejjem se nwasslu l-kunċett li Trilogy magħrufin għalih, anke wara t-twelid mill-ġdid tal-grupp tagħna. Issa, jekk ikollna x-xorti li nintgħażlu biex nirrappreżentaw lil Malta, aħna lesti u ppreparati għal dan il-għan.

Għadu kmieni ħafna f’dil-fażi biex tiġġudika, speċjalment minħabba li l-kanzunetti għadhom ma nstemgħux kollha. Però fl-aħħar ġimgħa malajr tinduna liema huma dawk il-kanzunetti li jkunu mal-favoriti. Nistennew u naraw.

Il-fatt li hemm tliet vuċijiet f’armonija totali, bi stil semi klassiku b’influenza kbira tal-ġeneru rock. L-isem Trilogy diġà assoċjat ma’ dan l-istil ‘crossover’ fil-gżejjer Maltin u lokalment irnexxielna noħolqu ħoss partikolari f’dan il-ġeneru. Kemm jista’ jkun nippruvaw noħolqu xogħol mużikali frisk però fl-istess ħin ta’ kull żmien u jappella għal kull età.

Karen Debattista – 12, Baker Street

Differenti, unika, interessanti.

Nispera li permezz ta’ din l-esperjenza, jinfetħuli bibien ġodda fil-karriera tal-mużika kemm hawn Malta kif ukoll barra minn xtutna.

Mill-ftit li rnexxieli nisma’, id-diska ta’ Corazon ‘Secretly’ laqtitni ħafna għall-fatt li tinstema’ veru sempliċi u tagħti lok biex tispikka il-vuċi sabiħa tagħha.

Id-diska tiegħi hija taħlita ta’ stili differenti li fl-opinjoni tiegħi, ftit smajna bħalhom f’edizzjonijiet passati tal-festival. Mill-ftit li smajt s’issa, ma naħsibx li hemm xi diska oħra li taqa’ taħt l-istess ġeneru ta’ mużika u dak huwa l-fatt li jagħmel id-diska tiegħi differenti.  

Franklin Calleja – Still Here

Persistenza għall-imħabba. 

Li tkun esperjenza oħra sabiħa li ngawdiha mal-kantanti sħabi u li tiftaħli aktar bibien u opportunitajiet oħra għal karriera tiegħi.

Hemm ħafna diski li veru għoġbuni, u diġà naf inkanta ħafna minnhom! Ma nistax nagħżel waħda partikolari għax hemm kompetizzjoni tajba din is-sena, però mbagħad dejjem ikun hemm dik il-kanzunetta li tispikka.

‘Still Here’ hi ballad moderna li forsi mhux imdorrijin nisimgħu s-soltu u bla dubju n-nies jistgħu jirrelataw magħha minħabba l-lirika diretta li għandha.

Deborah C – It’s Ok

Diska ferrieħa ħafna.

Bħal kull sena li nagħti preżentazzjoni tajba flimkien mat-tim tiegħi. Nispera li mmur tajjeb… Min-naħa tiegħi se nagħmel ħilti kollha mbagħad inħallu f’idejn Alla…

Sa issa ma tantx nista’ ngħid peress li għadna fil-proċess li noħorġu d-diska kollha kemm hi. Però bla dubju d-diski kollha li jaslu sal-fażi finali jkunu ta’ livell għoli.

‘It’s OK’ hija kanzunetta sempliċi immens fil-lirika sabiex wieħed ikun jista’ jkanta magħha. Meta tismagħha tibqa’ tiftakar il-melodija. Hija kanzunetta li żgur trid tibdel il-burdata ta’ ħafna individwi.

Ekklesia – Love & Let Go

Imħabba, servizz, għotja.

Waqt il-ħin tat-talb nitolbu flimkien biex il-Malta Eurovision Song Contest ikun esperjenza sabiħa għal kulħadd, u anke biex permezz tal-parteċipazzjoni tagħna ngħaddu messaġġ pożittiv u nkunu xhieda għall-Knisja f’Malta. 

Kull kanzunetta għandha l-potenzjal li tirbaħ... hija kompetizzjoni miftuħa u sabiħa...

Love and Let Go, hija l-istorja tagħna. Aħna nagħżlu li nħobbu lil dawn it-tfal bla kundizzjoni u meta jiġu biex jitilqu, inħossuha wisq iżda, we love and let go.

Lawrence Gray – The One That You Love 

Imħabba, realtà, passjoni. 

Qed nistenna li nitrasmetti emozzjoni qawwija lill- udjenza preżenti u lit-telespettaturi.

Diffiċli biex tagħżel meta ma tkunx smajt id-diski sħaħ.

Id-differenza hija li d-diska tiegħi titkellem fuq storja reali.

Jessika – Fandango 

Moderna, oriġinali u ferriħija.

Li nagħmel l-aħjar li nista’ biex joħroġ prodott tajjeb u li tingħoġob mhux biss mill-pubbliku, li dak il-vot dejjem kien ifisser ħafna għalija, iżda anke mill-membri tal-ġurija. 

Jien naħseb li din is-sena hemm ħafna kanzunetti sbieħ u li se  jolqtu kull ġenerazzjoni, peress li hemm stili differenti. Personalment naħseb li kulħadd ħaqqu jirbaħ għax naf kemm nistinkaw, però finalment l-għażla hi ta’ waħda u dan huwa f’idejn il-ġurija u dan jiddependi mit-tip ta’ mużika li togħġobhom. 

Hija kanzunetta li faċilment issibek tkantaha fi triqtek għax-xogħol jew inti u għaddej bil-ħajja mgħaġġla li ninsabu fiha. Naħseb ukoll li hija moderna u fiha strumenti differenti milli nisimgħu s-soltu. Hija wkoll kanzunetta li se ċċaqalqek tkun fejn tkun. 

Daniel Testa – Something in the Way

Pożittiva, ġovanili, friska.

Nixtieq li mmur aħjar mis-sena l-oħra, u lid-diska tiegħi tingħoġob mal-Maltin.

Togħġobni l-kanzunetta ta’ Lyndsay, għax hija ballad b’differenza.

Hija pożittiva b’mod differenti, u hija tip ta’ kanzunetta li s’issa qatt ma ġiet magħżula biex tirrappreżenta lil pajjiżna.

Amber - Warrior

Motivazzjoni, ispirazzjoni, kuraġġ. 

Qed nistenna li nikseb esperjenza kif ukoll maturità f’dan il-qasam. Apparti minn hekk, nixtieq li nsir naf aktar lil kantanti li qegħdin jipparteċipaw f’din l-edizzjoni. 

Milli smajt s’issa, m’għandhiex diska favorita partikolari għaliex il-kanzunetti kollha huma ta’ livell għoli ħafna, u differenti minn xulxin.

Id-diska tiegħi għandha messaġġ li jista’ jirrelata miegħu kull individwu, ta’ kull età. Apparti minn hekk, il-kanzunetta tiegħi hija fi stil modern.

Christabelle – Rush 

Tal-widna, faqa’, bomba. 

Ħeqq! Bħal kull kontestant/a ieħor nixtieq nirbaħ! 

Għalija hemm ballad tajba, t’Amber, Warrior u kitbuha Elton Zarb u l-Muxu wkoll, l-istess nies li kitbu Rush. 

Diska movimentata li ġġiegħlek tiżfen u tkanta magħha. Diska tal-widna ħafna li ġġiegħlek tieħu pjaċir u ma tixba’ qatt tismagħha! 

Chris Grech – Closed Doors 

Ħajti, saħħa, emozzjonijiet.

Nixtieq nesponi l-mużika tiegħi ’l barra minn xtutna kemm jista’ jkun. Inkun ovvjament ferħan se ntir jekk nirbaħ f’Malta u żgur li nagħmel kull ma nista’ biex nagħti ġieħ lill-pajjiżna u lil mużika li tant hi għall-qalbi.

Minn dak li smajt nista’ ngħid li d-diski kollha huma ta’ livell għoli ħafna. Għoġbuni b’mod partikolari d-diski ta’ Franklin, Corazon u Lawrence Gray.

Naħseb primarjament, il-fatt li ġej minn xena mużikali differenti awtomatikament l-istil se jkun kemxejn differenti, partikolarment għax huwa stil iktar b’saħħtu u jxaqleb lejn l-istil rock.

L-Aħwa – Beautiful To Me

Ferrieħa, pożittiva u tal-widna. 

Bħala aħwa, il-mużika tgħaqqadna ħafna. Din hija opportunità oħra fejn se nieħdu gost inkantaw flimkien u nagħtu gost lil ħaddieħor.

Hemm diversi li jinstemgħu sbieħ u kollha għandhom it-timbru partikolari tagħhom. Bla dubju se jkun spettaklu varjat!

Il-fatt li qed inkantawha flimkien bħala aħwa.

Raquel Galdes – Stop Haunting Me 

Haunting, onesta u misterjuża. 

Il-Eurovision kien il-ħolma tiegħi sa minn meta kont żgħira. Wara l-ħidma kollha li tkun ħdimt, bħal kull kantant ieħor, nistenna rispons tajjeb kif ukoll preżentazzjoni tajba min-naħa tiegħi bl-għajnuna tat-tim kollu. Però, il-Eurovision inġenerali ma narahx biss bħala kompetizzjoni iżda bħala opportunità sabiex tagħmel ħbieb u esperjenzi ġodda fl-industrija tal-mużika. 

Personalment id-diski kollha fihom l-istil u s-sabiħ tagħhom u diffiċli tagħżel waħda. Però, li kieku vera kelli nagħzel diska, nagħżel t’Amber, Warrior. Diska bi stil li vera jogħġobni, b’lirika b’saħħitha. 

Apparti l-melodija u l-lirika, naħseb l-iktar ħaġa li jagħmilha differenti hija l-vuċi. 

Danica Muscat – Close Your Eyes

L-imħabba ġenwina tal-omm.

Ħerqana biex inkanta l-kanzunetta li hija tant personali li titratta l-imħabba tal-omm għat-tarbija tagħha li għadni kif esperjenzajt jien stess ftit tax-xhur ilu, fuq wieħed mill-aqwa, jekk mhux l-aqwa, palk li qatt kien hawn Malta.

Ekklesia, ‘Love and Let Go’ għax ukoll titratta t-tfal u naprezza l-ħidma li jagħmlu dawn is-sorijiet għat-tfal li tant inħobbu aħna l-Maltin.

Li hija kanzunetta personali u emozzjonali li se tolqot lil kulħadd għax kulħadd għandu omm jew figura t’omm f’ħajtu.

Lyndsay Pace – Home 

Tal-widna, b’saħħitha u moderna.

Qed nistenna li nikkwalifika f’pożizzjoni tajba, nikseb ċertu popolarità u nitgħallem mill-esperjenza.

Id-diska favorita tiegħi fil-festival hi ‘Love and Let Go’ ta’ Ekklesia, għax għandha messaġġ qawwi u pożittiv.

L-istruttura u l-kompożizzjoni ta’ kif inhi maqsuma d-diska tiegħi fiha ħafna ħsieb u xogħol warajha. Avolja qiegħda fuq stil ballad, xorta wahda hija mexxejja u taqbad tkanta magħha mal-ewwel.

Corazon Mizzi – Secretly

Impenjattiva, kontemporanja u emottiva.

Qed nistenna esperjenza sabiħa u memorabbli.

Sa issa ma smajtx biżżejjed biex inkun nista’ ngħid.

Li ktibtha jien, kliem u mużika.

Iona Dalli – Could Have Been Me 

Tal-widna, vivaċi, realistika.

Qed nistenna li tkun esperjenza sabiħa, pożittiva f’kelma waħda tal-ġenn. 

L-Aħwa - Beautiful to Me, għax għandha stil sabiħ b’mużika li tolqot il-widna tan-nies.

L-istil ta’ diska huwa stil li ftit tisimgħu fil-Eurovision speċjalment ta’ Malta.

Domenique Azzopardi – Take Me As I Am 

Kanzunetta mimlija grinta

Ħaġa waħda biss, l-esperjenza li tgħaddi minnha, li tgħallmek ħafna u timmaturak. 

L-aktar diska favorita tiegħi hija Beautiful to Me kantanta mill-aħwa għaliex hija diska sempliċi iżda oriġinali.

Naħseb bħala kanzunetta hija differenti mill-oħrajn rigward stil li tagħmilha differenti ħafna mill-kanzunetti l-ohrajn partecipanti.

Dominic – Once in a While

Diska movimentata, tal-widna.

L-importanti huwa li toħroġ preżentazzjoni tajba u li nieħu pjaċir ninterpreta l-kanzunetta u ngawdi dawk it-tliet minuti.

Rush ta’ Christabelle Borg għax hija kanzunetta li tagħtik ħafna enerġija u ta’ Amber għax ukoll inħobb il-ballads apparti li leħen Amber dejjem għoġobni.

Hija kanzunetta pożittiva u ferriħija u li ġġiegħlek tiċċaqlaq mat-temp tagħha u l-melodija ħelwa li għandha.